គៀវ៖ នាយករដ្ឋមន្ត្រីអ៊ុយក្រែនលោក Denys Shmyhal បានជំរុញឱ្យគណៈកម្មការអឺរ៉ុប ធានាការនាំចេញផលិតផលកសិកម្មអ៊ុយក្រែន ទាំងអស់ដោយគ្មានដែនកំណត់ទៅកាន់សហភាពអឺរ៉ុប ទោះបីជាមានការអំពាវនាវរបស់ប៉ូឡូញ ឱ្យពន្យារពេលការហាមឃាត់ការនាំចេញក៏ដោយ។
លោក Shmyhal បានសរសេរថា “នេះគឺជាសកម្មភាពនៃសាមគ្គីភាព មិនត្រឹមតែជាមួយអ៊ុយក្រែន ប៉ុណ្ណោះទេ ប៉ុន្តែជាមួយពិភពលោក ដែលពឹងផ្អែកលើគ្រាប់ធញ្ញជាតិរបស់យើង” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ ។
លោកបានពណ៌នាអំពីចេតនារបស់ប្រទេសប៉ូឡូញ ក្នុងការបន្តរារាំងការនាំចេញគ្រាប់ធញ្ញជាតិរបស់អ៊ុយក្រែន ទៅកាន់សហភាពអឺរ៉ុបថា ជាចលនាមិនរាក់ទាក់ និងប្រជានិយម។ លោក Shmyhal បានបន្ដថា ការពន្យារពេលនៃការហាមឃាត់លើការនាំចេញគ្រាប់ធញ្ញជាតិរបស់អ៊ុយក្រែន នឹងប៉ះពាល់យ៉ាងធ្ងន់ធ្ងរដល់សន្តិសុខស្បៀងអាហារពិភពលោក និងសេដ្ឋកិច្ចរបស់ប្រទេសអ៊ុយក្រែន។
កាលពីខែឧសភា គណៈកម្មការអឺរ៉ុប បានដាក់បម្រាមលើការនាំចេញគ្រាប់ធញ្ញជាតិពីអ៊ុយក្រែនទៅប្រទេសអឺរ៉ុបចំនួន ៥។ កាលពីថ្ងៃពុធ នាយករដ្ឋមន្ត្រីប៉ូឡូញ លោក Mateusz Morawiecki បានអំពាវនាវឱ្យសហភាពអឺរ៉ុប បន្តការហាមឃាត់នេះ ដែលផុតកំណត់នៅថ្ងៃទី១៥ ខែកញ្ញា។
លោក Morawiecki បានសង្កត់ធ្ងន់ថា ប្រទេសប៉ូឡូញ នឹងមិនដកបម្រាមនេះទេ បើទោះជាសហភាពអឺរ៉ុប មិនយល់ព្រមលើការពន្យារពេលរបស់ខ្លួនក៏ដោយ នេះបើតាមរបាយការណ៍ប្រព័ន្ធផ្សព្វផ្សាយ៕
ប្រែសម្រួល ឈូក បូរ៉ា
