បរទេស ៖ លោក Thanakorn Wangboonkongchana រដ្ឋមន្ត្រីការិយាល័យ នាយករដ្ឋមន្ត្រីបាននិយាយថា នាយករដ្ឋមន្ត្រីថៃ លោកឧត្តមសេនីយ៍ ប្រាយុទ្ធ ចាន់អូចា មានការព្រួយបារម្ភ ចំពោះការប្រមូលផ្តុំ ដែលរៀបចំដោយក្រុមអ្នកគាំទ្រ គណបក្សចលនាឆ្ពោះទៅមុខ ឬ Move Forward (MFP) ដែលតវ៉ាប្រឆាំងនឹងព្រឹទ្ធសភា ។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី២៩ ខែកក្កដា ឆ្នាំ២០២៣ បានឱ្យដឹងថា លោក Thanakorn បាននិយាយកាលពីម្សិលមិញថា ឧត្តមសេនីយ៍ ប្រាយុទ្ធ បានសម្តែងការព្រួយបារម្ភ អំពីការប្រមូលផ្តុំគ្នាដោយការភ័យខ្លាចថា ពួកគេអាចទាញប្រទេស ឱ្យវិលទៅរកជម្លោះ រវាងក្រុមនយោបាយផ្សេងៗគ្នា។
លោក Thanakorn អនុប្រធានគណបក្ស United Thai Nation (UTN) បាននិយាយថា លោកចង់ឱ្យគណបក្ស MFP រំលឹកដល់អ្នកគាំទ្រ របស់ខ្លួនឱ្យគោរពតាមច្បាប់។
លោកឧត្តមសេនីយ៍ ប្រាយុទ្ធ ចាន់អូចា ព្រួយបារម្ភអំពីការប្រមូលផ្តុំ MFP ប្រឆាំងនឹងព្រឹទ្ធសភា ដោយអ្នកគាំទ្រគណបក្សចលនាឆ្ពោះទៅមុខ ដែលឈ្នះការបោះឆ្នោត គឺមិនសប្បាយចិត្ត នឹងសមាជិកព្រឹទ្ធសភាភាគច្រើន ដែលត្រូវបានតែងតាំងដោយរបបយោធា ហើយពួកគេមិនបោះឆ្នោត ឱ្យបេក្ខជននាយករដ្ឋមន្ត្រី របស់គណបក្ស លោក Pita Limjaroenrat ។
លោក Thanakorn បានរំលឹកឡើងវិញថា UT នឹងមិនបោះឆ្នោតឱ្យបេក្ខជននាយករដ្ឋមន្ត្រី ណាមួយពីគណបក្សណាមួយឡើយ ដរាបណា គណបក្សចលនាឆ្ពោះទៅមុខ (MFP) នៅតែជាដៃគូចម្រុះ ហើយសំខាន់ជាងនេះ គឺដោយសារតែជំហររបស់ MFP លើការកែប្រែមាត្រា ១១២ នៃក្រមព្រហ្មទណ្ឌ ឬច្បាប់ស្តីពីការប្រមាថព្រះមហាក្សត្រ។
នៅពេលសួរថាតើគណបក្សភឿថៃ បានចូលមកជិតគណបក្ស UTN ដើម្បីបង្កើតរដ្ឋាភិបាលឬអត់នោះ លោក Thanakorn បាននិយាយថា លោកមិនបានដឹងទេ ខណៈដែលមេដឹកនាំគណបក្ស និងជាអគ្គលេខាធិការ ដោះស្រាយបញ្ហាបែបនេះ។
អនុប្រធានគណបក្ស UTN បានបង្ហាញទំនុកចិត្តថា គណបក្សរបស់លោក និងបក្សភឿថៃ អាចធ្វើការជាមួយគ្នាបាន ព្រោះពេលនេះជាពេលដែលភាគីទាំងអស់ត្រូវរួមដៃគ្នាជួយប្រទេសឆ្ពោះទៅមុខ។
លោកថ្លែងថា «មិនឃើញមានបញ្ហាអ្វី សម្រាប់គណបក្សទាំងពីរធ្វើការជាមួយគ្នាទេ ដរាបណាយើងប្រកាន់ខ្ជាប់ជាចម្បង ដើម្បីផលប្រយោជន៍ប្រទេស»។ លោក Thanakorn បាននិយាយទៀតថា នាយករដ្ឋមន្ត្រីថ្មីនឹងត្រូវបានជ្រើសរើស ក្នុងពេលឆាប់ៗនេះបន្ទាប់ពីការចរចាបន្ថែម៕
ប្រែសម្រួលៈ ណៃ តុលា
