បរទេស ៖ ប្រធានាធិបតីរុស្ស៊ី លោក Vladimir Putin បាននិយាយ កាលពីថ្ងៃសុក្រថា ជាមួយនឹងជនជាតិរុស្សី ជាង៣០ម៉ឺននាក់ ដែលបានចុះកិច្ចសន្យា យោធាត្រឹមឆ្នាំនេះនោះ ទីក្រុងមូស្គូ ដូចជាមិនចាំបាច់អ្វី ដែលត្រូវការអ្នកប្រយុទ្ធបរទេស ឬទាហានស៊ីឈ្នួលនោះទេ ។
យោងតាមការចេញផ្សាយរបស់ RT លោកបានបន្ថែមថា រុស្ស៊ីមិនចាំបាច់អញ្ជើញ មនុស្សមកពីបរទេស សម្រាប់ប្រតិបត្តិការប្រយុទ្ធនេះនោះទេ ពោលគឺមិនដូចទៅនឹងអ្វី ដែលប្រព័ន្ធផ្សព្វផ្សាយបានប៉ាន់ស្មាន លើការជ្រើសរើស ទាហានស៊ីឈ្នួល គាត់បានប្រាប់អ្នកយកព័ត៌មាននៅទីក្រុង Sochi បន្ទាប់ពីជួបជាមួយប្រធានាធិបតី Alexander Lukashenko នៃប្រទេសបេឡារុស្សឡើយ ។
ប្រធានាធិបតីរុស្ស៊ីក៏កំពុង ឆ្លើយសំណួរមួយអំពីការរំពឹងទុក នៅប្រទេសលោកខាងលិចថា កូរ៉េខាងជើងប្រហែល ជាបានសន្យាបញ្ជូនទាហាន នៅពេលដែលលោក Putin បានជួបជាមួយលោក Kim Jong-un នៅដើមសប្តាហ៍នេះ ។
លោកបាននិយាយបែបនេះថា គិតត្រឹមព្រឹកនេះ មានកិច្ចសន្យាចំនួន៣០ម៉ឺននាក់មកហើយ ដែលបានបង្ហាញអំពីភាពស្នេហាជាតិ ខ្ពស់បំផុត ដែលបានជំរុញប្រជាជនរុស្ស៊ី ឱ្យស្ម័គ្រចិត្តចូលបម្រើយោធា ។ លោកបានបន្ថែមថា ទាហានទាំងនោះក៏ត្រូវបានបំពាក់ដោយ អាវុធទំនើប និងផ្នែករឹងជាច្រើនផងដែរ ។
គួរឲ្យដឹងដែរថា កាលពីដើមខែកក្កដា ក្រសួងការបរទេសរុស្ស៊ី បានប៉ាន់ប្រមាណថា ទាហានស៊ីឈ្នួលឬទាហានបរទេសជិត ១២០០០នាក់ បានចូលរួមជាមួយកងកម្លាំង ប្រដាប់អាវុធអ៊ុយក្រែន ចាប់តាំងពីជម្លោះបានកើនឡើងក្នុងខែកុម្ភៈ ឆ្នាំ ២០២២ ប៉ុន្តែមានតែ ២.២០០ នាក់ប៉ុណ្ណោះ ដែលនៅតែសកម្មភាព មកទល់នឹងពេលនេះ ៕
ប្រែសម្រួល៖ស៊ុនលី
