ភូកេត ៖ ប៉ូលិសបាននិយាយថា ស្ត្រីជនជាតិចិនម្នាក់បានស្លាប់ដោយធ្លាក់ពីកម្ពស់ជាន់ទី ១០ នៃសណ្ឋាគារមួយក្នុងសង្កាត់ Muang នៃកោះរមណីយដ្ឋានភាគខាងត្បូងនេះ កាលពីព្រឹកថ្ងៃសុក្រ។ ស្ត្រីអាយុ៣៤ឆ្នាំរូបនេះបានមកដល់ប្រទេសថៃកាលពីថ្ងៃចន្ទតាមទិដ្ឋាការទេសចរណ៍។
យោងតាមសារព័ត៌មាន Bangkok Post ចេញផ្សាយកាលពីថ្ងៃទី៦ ខែតុលា ឆ្នាំ២០២៣ បានឱ្យដឹងថា ឈ្មោះ Hassen Hamrouni អាយុ ៣៥ ឆ្នាំ ជាជនជាតិទុយនីស៊ីបានប្រាប់អ្នកស៊ើបអង្កេតប៉ូលីសថា គាត់និងស្ត្រីខាងលើជាគូស្នេហ៍នឹងគ្នា។ ពួកគេបានចូលទៅក្នុងសណ្ឋាគារ Pullman ក្នុងសង្កាត់ Karon នៅម៉ោង ៣ រសៀលថ្ងៃព្រហស្បតិ៍ ហើយស្នាក់នៅក្នុងបន្ទប់មួយនៅជាន់ទី ១០។
បន្ទាប់ពីបានញ៉ាំអាហារពេលល្ងាច និងផឹកស្រានៅភោជនីយដ្ឋានមួយ នៅសណ្ឋាគារកាលពីល្ងាចថ្ងៃព្រហស្បតិ៍ ពួកគេបានឡើងទៅបន្ទប់នៅម៉ោង ១០ យប់។ លោក Hamrouni បាននិយាយថា ខណៈពេលដែលពួកគេ នៅក្នុងបន្ទប់ មិត្តស្រីរបស់គាត់បាននិយាយម្តងហើយម្តងទៀតថា នាងចង់ស្លាប់ ប៉ុន្តែគាត់មិនបានយកចិត្តទុកដាក់ចំពោះអ្វីដែលនាងនិយាយនោះទេ។
នៅម៉ោងមុនអាធ្រាតកាលពីថ្ងៃសុក្រ ខណៈគាត់នៅក្នុងបន្ទប់ទឹក ស្ត្រីនោះបានដើរទៅយ៉រខាងមុខ ហើយព្យាយាមលោតចុះ។ ឃើញបែបនោះ គាត់បានចេញមកទាន់ពេល ដើម្បីឃាត់នាង នាំនាងចូលបន្ទប់វិញ ហើយព្យាយាមធ្វើឱ្យនាងស្ងប់ចិត្ត។ ប្រហែលមួយម៉ោងក្រោយមក ស្ត្រីនោះបានរត់ចេញទៅយ៉រ ហើយព្យាយាមលោតចុះពីលើ។
មិត្តប្រុសរបស់នាងបាននិយាយថា គាត់អាចចាប់ជើងម្ខាងរបស់នាងបាន ប៉ុន្តែមិនអាចទប់បានដោយសារទម្ងន់របស់នាង។
Krittana Kingmala បុគ្គលិកទទួលភ្ញៀវ របស់សណ្ឋាគារបានប្រាប់ប៉ូលីសថានៅម៉ោងប្រហែល ៤ ទៀបភ្លឺខណៈដែលកំពុងដើរលើផ្លូវ ទៅកាន់បន្ទប់ទទួលភ្ញៀវរបស់សណ្ឋាគារគាត់បានឮមនុស្សស្រែក ។ គាត់ក្រឡេកមើលទៅឃើញបុរសម្នាក់ កាន់ជើងនារីម្នាក់នៅលើយ៉រនៅជាន់ទី១០។ ស្ត្រីម្នាក់បានធ្លាក់ពីលើផ្លូវដើរស្លាប់ភ្លាមៗ ៕
ប្រែសម្រួលៈ ណៃ តុលា
