បរទេស៖ ជនបរទេសរាប់សិបនាក់ត្រូវបានសម្លាប់ រងរបួស ឬចាប់ជាចំណាប់ខ្មាំង អំឡុងពេលការវាយប្រហារដ៏គួរឱ្យភ្ញាក់ផ្អើលមួយលើអ៊ីស្រាអែល ដោយក្រុមសកម្មប្រយុទ្ធប៉ាឡេស្ទីន ហាម៉ាស ដែលបានបណ្តាលឱ្យមនុស្ស ៨០០ នាក់ស្លាប់ ដែលភាគច្រើនជាជនជាតិអ៊ីស្រាអែល។
បើតាមប្រភពពីសារព៏ត៌មាន AFP បានឱ្យដឹងថា ជនបរទេសដែលបាត់ខ្លួនជាច្រើននាក់បានចូលរួមក្នុងពិធីបុណ្យតន្ត្រីអេឡិចត្រូនិកមួយនៅវាលខ្សាច់ភាគខាងត្បូងនៃប្រទេសអ៊ីស្រាអែល ដែលក្នុងនោះអ្នកសំដែងជាច្រើនត្រូវបានសម្លាប់។
-ប្រទេសថៃ៖ ស្លាប់១២នាក់ ចំណាប់ខ្មាំង១១នាក់
អ្នកនាំពាក្យក្រសួងការបរទេសថៃ លោកស្រី Kanchana Patarachoke បាននិយាយកាលពីថ្ងៃចន្ទថា ពលករថៃ១២នាក់បានស្លាប់ ៨នាក់រងរបួស និង១១នាក់ត្រូវបានចាប់ខ្លួន។
រដ្ឋមន្ត្រីក្រសួងការងារថៃ លោក Phiphat Ratchakitprakarn បាននិយាយថា មានពលករថៃប្រមាណ ៥.០០០នាក់ កំពុងធ្វើការនៅតំបន់ដែលរងគ្រោះដោយការប្រយុទ្ធគ្នា ដែលកំពុងត្រូវបានផ្លាស់ទៅទីទួលសុវត្ថិភាព។
-អាមេរិក៖ ស្លាប់១១នាក់ និងបាត់ខ្លួន –
សហរដ្ឋអាមេរិកកាលពីថ្ងៃចន្ទបានបញ្ជាក់ពីការស្លាប់របស់ពលរដ្ឋអាមេរិកយ៉ាងហោចណាស់ ១១ នាក់ ហើយបាននិយាយថា វា “ទំនងជា” ដែលជនជាតិអាមេរិកស្ថិតក្នុងចំណោមចំណាប់ខ្មាំងដែលត្រូវបានក្រុមហាម៉ាសចាប់ឃុំខ្លួន។
លោកប្រធានាធិបតី Joe Biden បាននិយាយនៅក្នុងសេចក្តីថ្លែងការណ៍មួយថា “គួរឱ្យសោកស្តាយ ឥឡូវនេះយើងដឹងថា យ៉ាងហោចណាស់មានពលរដ្ឋអាមេរិកចំនួន ១១ នាក់ ស្ថិតក្នុងចំណោមអ្នកដែលត្រូវបានសម្លាប់ ដែលភាគច្រើនជាអ្នកតាំងទីលំនៅទីពីរនៅក្នុងប្រទេសអ៊ីស្រាអែល” ។
-នេប៉ាល់៖ ស្លាប់១០នាក់
ស្ថានទូតសាធារណរដ្ឋហិមាល័យនៅទីក្រុង តែលអាវែវ បាននិយាយកាលពីថ្ងៃអាទិត្យថា ពលរដ្ឋនេប៉ាល់ចំនួន ១០ នាក់ត្រូវបានសម្លាប់នៅក្នុងទីក្រុង Kibbutz Alumim ដែលជាចំណុចមួយនៃការវាយលុករបស់ពួកហាម៉ាស។
ស្ថានទូតបានបន្ថែមថា មនុស្សបួននាក់ផ្សេងទៀតកំពុងត្រូវបានព្យាបាលនៅក្នុងមន្ទីរពេទ្យ ខណៈដែលការស្វែងរកកំពុងដំណើរការសម្រាប់មនុស្សទីប្រាំ។
Kibbutz Alumim កំពុងទទួលសិស្ស ១៧ នាក់នៅពេលមានការវាយប្រហារ។
- អាហ្សង់ទីន៖ ស្លាប់ ៧នាក់ និងបាត់ខ្លួន ១៥នាក់
ក្រសួងការបរទេសរបស់ប្រទេសអាហ្សង់ទីនកាលពីថ្ងៃចន្ទបានអះអាងថា ជនជាតិចំនួន៧នៃប្រទេសនេះត្រូវបានសម្លាប់ និង ១៥ នាក់ផ្សេងទៀតកំពុងបាត់ខ្លួន។
-អ៊ុយក្រែន៖ ស្លាប់២នាក់
អ្នកនាំពាក្យក្រសួងការបរទេសអ៊ុយក្រែន លោក Oleg Nikolenko បាននិយាយកាលពីថ្ងៃអាទិត្យថា ស្ត្រីជនជាតិអ៊ុយក្រែន២នាក់ដែលបានរស់នៅក្នុងប្រទេសអ៊ីស្រាអែលអស់រយៈពេលជាច្រើនឆ្នាំត្រូវបានសម្លាប់។
-បារាំង៖ ស្លាប់២នាក់ និងបាត់ខ្លួន១៤នាក់
រដ្ឋាភិបាលបារាំងបាននិយាយថា ប្រជាជនបារាំង២នាក់ត្រូវបានសម្លាប់ក្នុងការវាយប្រហារភេរវកម្មរបស់ក្រុមហាម៉ាសប្រឆាំងនឹងអ៊ីស្រាអែល។
ក្រសួងការបរទេសបារាំងបាននិយាយថា ក្មេងអាយុ១២ឆ្នាំម្នាក់ស្ថិតក្នុងចំណោមជនជាតិខ្លួន១៤នាក់ដែលបាត់ខ្លួនបន្ទាប់ពីក្រុមហាម៉ាស់បានបើកការវាយប្រហារដ៏សាហាវចូលក្នុងប្រទេសអ៊ីស្រាអែល ដោយហៅស្ថានភាពនេះថាជាការព្រួយបារម្ភ។
ក្រសួងបាននិយាយនៅក្នុងសេចក្តីថ្លែងការណ៍មួយថា “ផ្អែកលើព័ត៌មានដែលយើងមាន យើងចាត់ទុកថាវាទំនងជាខ្ពស់ដែលថាពួកគេមួយចំនួនត្រូវបានចាប់ពង្រត់” ដោយបន្ថែមថា “ចំនួននេះនៅតែអាចផ្លាស់ប្តូរ”។
-រុស្ស៊ី៖ ស្លាប់ ១នាក់ និងបាត់ខ្លួន ៤ នាក់
ស្ថានទូតរុស្ស៊ីនៅទីក្រុង តែលអាវែវ បានប្រកាសនៅថ្ងៃចន្ទនេះ ដោយបានដកស្រង់សម្តីដោយទីភ្នាក់ងារសារព័ត៌មានរុស្ស៊ីថា យ៉ាងហោចណាស់ជនជាតិរុស្ស៊ីម្នាក់បានស្លាប់ និង ៤នាក់ផ្សេងទៀតកំពុងបាត់ខ្លួន។
- ចក្រភពអង់គ្លេស ៖ ស្លាប់១នាក់ និងបាត់ខ្លួន១នាក់ –
ឯកអគ្គរដ្ឋទូតអ៊ីស្រាអែលប្រចាំប្រទេសអង់គ្លេសបាននិយាយថា មានពលរដ្ឋអង់គ្លេសអាយុ ២៦ ឆ្នាំម្នាក់បានបាត់ខ្លួន ដោយមិនបញ្ចេញឈ្មោះនោះទេ។
គ្រួសាររបស់គាត់បាននិយាយកាលពីថ្ងៃអាទិត្យថា បុរសជនជាតិអង់គ្លេសម្នាក់ដែលកំពុងបម្រើក្នុងជួរកងទ័ពអ៊ីស្រាអែល Nathanel Young អាយុ ២០ ឆ្នាំក៏បានស្លាប់នៅក្នុងការប្រយុទ្ធជាមួយក្រុមហាម៉ាសផងដែរ។
-កាណាដា៖ ស្លាប់១នាក់ និងបាត់ខ្លួន៣នាក់ –
រដ្ឋាភិបាលកាណាដាបាននិយាយកាលពីថ្ងៃចន្ទថា ជនជាតិកាណាដាម្នាក់បានស្លាប់ និងបីនាក់ផ្សេងទៀតកំពុងបាត់ខ្លួន។
-កម្ពុជា៖ ស្លាប់ ១នាក់
សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានថ្លែងថា និស្សិតខ្មែរម្នាក់ត្រូវបានគេសម្លាប់។
- អាល្លឺម៉ង់៖ ចំណាប់ខ្មាំងជាច្រើននាក់
ប្រភពក្រសួងការបរទេសអាល្លឺម៉ង់បាននិយាយកាលពីថ្ងៃអាទិត្យថា ជនជាតិអាឡឺម៉ង់ កាត់អ៊ីស្រាអែល ជាច្រើននាក់ត្រូវបានចាប់ពង្រត់។
-ប្រេស៊ីល៖ បាត់ខ្លួន៣នាក់
ក្រសួងការបរទេសរបស់ប្រទេសប្រេស៊ីលបាននិយាយកាលពីថ្ងៃអាទិត្យថា ជនជាតិប្រេស៊ីលដើមកំណើតអ៊ីស្រាអែល ៣នាក់បានបាត់ខ្លួនបន្ទាប់ពីបានចូលរួមពិធីបុណ្យនេះ។
- ឈីលី៖ បាត់ខ្លួន ២ នាក់
ក្រសួងការបរទេសស៊ីលីបានបញ្ជាក់កាលពីថ្ងៃចន្ទថា ជនជាតិខ្លូនពីរ
នាក់កំពុងបាត់ខ្លួន។ ប្តីប្រពន្ធនេះរស់នៅមិនឆ្ងាយពីព្រំដែនអ៊ីស្រាអែលជាមួយហ្គាហ្សា។
-អ៊ីតាលី៖ បាត់ខ្លួន២នាក់
រដ្ឋមន្ត្រីការបរទេសអ៊ីតាលី លោក Antonio Tajani បាននិយាយថា ជនជាតិអ៊ីស្រាអែលដើមកំណើតអ៊ីតាលីពីរនាក់បានបាត់ខ្លួន។
- ប៉ារ៉ាហ្គាយ៖ បាត់ខ្លួន ២ នាក់ –
រដ្ឋាភិបាលប៉ារ៉ាហ្គាយបាននិយាយថា ជនជាតិប៉ារ៉ាហ្គាយពីរនាក់ ដែលធ្លាប់រស់នៅក្នុងប្រទេសអ៊ីស្រាអែល បានបាត់ខ្លួន ដោយមិនបានផ្តល់ព័ត៌មានលម្អិត។ - ប៉េរូ៖ បាត់ខ្លួន ២ នាក់
ក្រសួងការបរទេសប៉េរូបាននិយាយថា ជនជាតិពីរនាក់បានបាត់ខ្លួន ដោយមិនបានផ្តល់ព័ត៌មានលម្អិតបន្ថែមទៀតទេ។ - តង់ហ្សានី៖ បាត់ខ្លួន ២ នាក់
ឯកអគ្គរដ្ឋទូតតង់ហ្សានីប្រចាំប្រទេសអ៊ីស្រាអែលបានប្រាប់ AFP ថាជនជាតិតង់ហ្សានីពីរនាក់បានបាត់ខ្លួន។ - ម៉ិកស៊ិក៖ ២នាក់ ត្រូវបានចាប់ជាចំណាប់ខ្មាំង
រដ្ឋមន្ត្រីការបរទេសម៉ិកស៊ិក Alicia Barcena បានសរសេរនៅលើ X ដែលជាអតីត Twitter ថា ជនជាតិម៉ិកស៊ិកពីរនាក់ គឺ បុរស និងស្រ្តីម្នាក់ ត្រូវបានចាប់ធ្វើជាចំណាប់ខ្មាំង ដោយមិនបានផ្តល់ព័ត៌មានលម្អិតបន្ថែម។
- កូឡុំប៊ី៖ ២នាក់ ត្រូវបានចាប់ជាចំណាប់ខ្មាំង
ឯកអគ្គរដ្ឋទូតអ៊ីស្រាអែលប្រចាំប្រទេសកូឡុំប៊ីបាននិយាយនៅលើ X. ជនជាតិកូឡុំប៊ីពីរនាក់ដែលចូលរួមក្នុងពិធីបុណ្យ Supernova បានបាត់ខ្លួន។ - ប៉ាណាម៉ា៖ បាត់ខ្លួន ១ នាក់ និង អៀរឡង់ បាត់ខ្លួនម្នាក់៕
- ប្រែសម្រួលៈ ណៃ តុលា
