តូក្យូ៖ រដ្ឋមន្ត្រីការបរទេសជប៉ុន និងវៀតណាម បានអះអាងថា ប្រទេសរបស់ពួកគេ គឺជាដៃគូដ៏សំខាន់ក្នុងការសម្រេចបាននូវឥណ្ឌូប៉ាស៊ីហ្វិកសេរី និងបើកចំហ ដែលជាចក្ខុវិស័យដែលគាំទ្រដោយទីក្រុងតូក្យូ ដើម្បីទប់ទល់នឹងការកើនឡើងនៃឥទ្ធិពលរបស់ចិននៅក្នុងតំបន់។
នៅក្នុងជំនួបនៅទីក្រុងហាណូយ រដ្ឋមន្ត្រីការបរទេសជប៉ុនលោកស្រី Yoko Kamikawa និងសមភាគីវៀតណាមលោក Bui Thanh Son បានព្រមព្រៀងគ្នាធ្វើការរួមគ្នា ដើម្បីនាំទំនាក់ទំនងទ្វេភាគីឡើងដល់កម្ពស់ថ្មី នេះបើយោងតាមក្រសួងការបរទេសជប៉ុន។
កិច្ចពិភាក្សានេះបានធ្វើឡើងនៅពេលដែលចំណងមិត្តភាពចិន-ជប៉ុន បានបែកបាក់គ្នាជុំវិញប្រជុំកោះសេនកាគូ ដែលទាមទារដោយទីក្រុងប៉េកាំង នៅសមុទ្រចិនខាងកើត។ ទន្ទឹមនឹងនោះ វៀតណាម កាន់តែមានការប្រុងប្រយ័ត្ន ចំពោះការពង្រីកសកម្មភាពយោធា និងការទាមទារទឹកដីរបស់ទីក្រុងប៉េកាំង នៅសមុទ្រចិនខាងត្បូង។
ក្រសួងបានឲ្យដឹងថា ជាមួយនឹងឆ្នាំនេះជាការរំលឹកខួបលើកទី៥០ នៃទំនាក់ទំនងជប៉ុន-វៀតណាម លោកស្រី Kamikawa និងលោក Son ក៏បានសន្យាជំរុញកិច្ចសហប្រតិបត្តិការរបស់ពួកគេក្នុងវិស័យសេដ្ឋកិច្ចផងដែរ។
កាលពីថ្ងៃចន្ទលោកស្រី Kamikawa បានធ្វើទស្សនកិច្ចនៅប្រទេសប្រ៊ុយណេ ហើយបានជួបជាមួយសមភាគីរបស់លោកស្រី Erywan Yusof។ ក្រសួងការបរទេសជប៉ុនបានឲ្យដឹងថា ពួកគេបានបញ្ជាក់ថា កិច្ចសហការរវាងរដ្ឋាភិបាលទាំងពីរបាននិងកំពុងធ្វើឲ្យស៊ីជម្រៅក្នុងវិស័យ ដូចជាថាមពល បម្រែបម្រួលអាកាសធាតុ និងសន្តិសុខ៕
ប្រែសម្រួល ឈូក បូរ៉ា
