ហ្គាហ្សា៖ ការិយាល័យអង្គការសហប្រជាជាតិ សម្រាប់ការសម្របសម្រួលកិច្ចការមនុស្សធម៌ (OCHA) បានឲ្យដឹងថា វិបត្តិមនុស្សធម៌នៅហ្គាហ្សា បានឈានដល់ចំណុចអាក្រក់បំផុត ដែលមិនធ្លាប់មានពីមុនមក។
ទីភ្នាក់ងារអង្គការសហប្រជាជាតិ សម្រាប់ជនភៀសខ្លួនប៉ាឡេស្ទីន ឬ UNRWA ដែលជាអ្នកផ្តល់ជំនួយមនុស្សធម៌ដ៏ធំបំផុតនៅក្នុងតំបន់ហ្គាហ្សា បានព្រមានថា ទីភ្នាក់ងារនេះនឹងត្រូវបង្ខំឱ្យបញ្ឈប់ប្រតិបត្តិការទាំងអស់នៅយប់ថ្ងៃពុធ លើកលែងតែប្រេងឥន្ធនៈត្រូវបានអនុញ្ញាតឱ្យចូលទៅក្នុងហ្គាហ្សាភ្លាមៗ។
មន្ទីរពេទ្យនានាកំពុងបិទទ្វារ ដោយសារពួកគេខ្វះខាតប្រេងឥន្ធនៈ ទឹក ការផ្គត់ផ្គង់ពេទ្យ និងបុគ្គលិក។ ឥន្ធនៈកំពុងត្រូវបានកំណត់យ៉ាងធ្ងន់ធ្ងរ សម្រាប់ចំនួនគ្រឿងបរិក្ខារសំខាន់ៗ ដែលជ្រើសរើស។ OCHA បានឲ្យដឹងថា ម៉ាស៊ីនភ្លើងបម្រុងទុកមិនត្រូវបានរចនាឡើង សម្រាប់ប្រតិបត្តិការបន្តនោះទេ។
បុគ្គលិកអង្គការសហប្រជាជាតិ បានទៅពិនិត្យមន្ទីរពេទ្យកាលពីថ្ងៃអង្គារ។ នៅក្នុងមន្ទីរពេទ្យមួយ ពួកគេបានកត់សម្គាល់ឃើញអ្នករបួសរាប់រយនាក់ទាំងបុរស ស្ត្រី និងកុមារ។ ពួកគេជាច្រើននាក់បានសន្លប់ដោយមានរបួសមុខរបួស ដេកលើគ្រែពូកខ្លះ និងនៅលើឥដ្ឋខ្លះ ដោយមានការចូលរួមពីគ្រូពេទ្យមានកម្រិត។ នៅក្នុងទីធ្លានោះមានតង់មួយ ដែលមានសាកសពរាប់សិបនាក់ រួមទាំងកុមារផងដែរ។ អ្នកស្លាប់ជាច្រើនត្រូវបានរក្សាទុកនៅទីនោះ ដោយសារតែកន្លែងបញ្ចុះសពមានពេញទៅដោយសពទៅហើយ។
ស្តុកអាហារក៏កំពុងអស់ហើយដេរ។ កម្មវិធីស្បៀងអាហារពិភពលោក បានប៉ាន់ប្រមាណថា ការផ្គត់ផ្គង់អាហារសំខាន់ៗនាពេលបច្ចុប្បន្ននៅក្នុងតំបន់ហ្គាហ្សា គឺគ្រប់គ្រាន់ សម្រាប់រយៈពេលប្រហែល ១២ថ្ងៃ។ OCHA បានឲ្យដឹងថា ទោះជាយ៉ាងណាក៏ដោយ នៅតាមហាងនានា ស្តុក ដែលអាចរកបានត្រូវបានគេរំពឹងថា នឹងមានរយៈពេលត្រឹមតែ ៥ ថ្ងៃប៉ុណ្ណោះ។
មនុស្សកំពុងងាកមកបរិភោគទឹកអណ្តូង ដែលមានជាតិប្រៃខ្លាំង ហើយបង្កហានិភ័យដល់សុខភាពភ្លាមៗ។ ដៃគូសុខភាពក៏បានរកឃើញករណីជំងឺអុតស្វាយ កមរមាស់ និងរាគ ដោយសារលក្ខខណ្ឌអនាម័យមិនល្អ និងការទទួលទានទឹកពីប្រភពមិនមានសុវត្ថិភាព។
ចំនួនជនភៀសខ្លួនខាងក្នុងឥឡូវនេះត្រូវបានប៉ាន់ប្រមាណថា មានជាង ១,៤លាននាក់ រួមទាំងមនុស្សជិត ៥៩ម៉ឺន នាក់ដែលកំពុងស្នាក់នៅក្នុងជម្រក ដែលកំណត់ដោយ UNRWA ។ ប្រភពបានបញ្ជាក់ទៀតថា ច្រើនជាង ១៥ ភាគរយនៃជនភៀសខ្លួនត្រូវបានប៉ាន់ប្រមាណថា មានពិការភាព ប៉ុន្តែជម្រកភាគច្រើនមិនត្រូវបានបំពាក់គ្រប់គ្រាន់ សម្រាប់តម្រូវការរបស់ពួកគេ៕ ប្រែសម្រួល ឈូក បូរ៉ា
