បរទេស៖ ប្រទេសហ្ស៊កដានី បានដឹកនាំការអំពាវនាវរបស់អារ៉ាប់ ឲ្យមានបទឈប់បាញ់នៅក្នុងសង្រ្គាមហ្គាហ្សា ខណៈអ្នកស្លាប់និងរបួសកើនឡើង។ អ្នកវិភាគអារ៉ាប់ព្រមានថា ការឈ្លានពានរបស់អ៊ីស្រាអែលដើម្បីបំផ្លាញក្រុមហាម៉ាស អាចនឹងឈានដល់ជម្លោះក្នុងតំបន់កាន់តែធំ។ ដៃគូសន្តិភាពរបស់អ៊ីស្រាអែល រួមមាន ហ្ស៊កដានី និងអេហ្ស៊ីប បានបដិសេធរាល់ការផ្ទេរប្រជាជនប៉ាឡេស្ទីនទៅកាន់ប្រទេសរបស់ពួកគេ។
យោងតាមសារព័ត៌មាន VOA ចេញផ្សាយនៅថ្ងៃទី២៧ ខែតុលា ឆ្នាំ២០២៣ បានឱ្យដឹងថា នៅពេលដែលការស្លាប់របស់ជនស៊ីវិលកើនឡើង និងស្ថានភាពមនុស្សធម៌កាន់តែយ៉ាប់យ៉ឺននៅក្នុងហ្គាហ្សា, អ៊ីស្រាអែលបានប្តេជ្ញាថា នឹងលុបបំបាត់ក្រុមហាម៉ាស់ ដែលកំណត់ដោយអ៊ីស្រាអែល សហរដ្ឋអាមេរិក និងសហភាពអឺរ៉ុបថា ក្រុមនេះជាអង្គការភេរវករ។
អតីតរដ្ឋមន្ត្រីការបរទេសហ្ស៊កដានី លោក Marwan Muasher បានប្រាប់ក្រុមមជ្ឈមណ្ឌលអនឡាញ Carnegie Mideast នៅសប្តាហ៍នេះថា ការលុបបំបាត់ពួកសកម្មប្រយុទ្ធអាចបង្ហាញពីការលំបាក ដោយសារក្រុមហាម៉ាស់ “បានក្លាយទៅជាមនោគមវិជ្ជាមួយ ហើយដែលក្រុមនេះមិនមែនគ្រាន់តែជាចលនាមួយប៉ុណ្ណោះនោះទេ”។
លោក Muasher បានព្រមានថា «ប្រសិនបើម៉ាស៊ីនយោធារបស់ក្រុមហាម៉ាសត្រូវបានបំផ្លាញ ខ្ញុំខ្លាចក្រុមហាម៉ាសជាច្រើនទៀតនឹងផ្ទុះឡើង»។
លោកបន្តថា “ដំណោះស្រាយយោធាប្រភេទនេះមិនអាចដោះស្រាយបញ្ហានេះបានទេ។ មានតែដំណើរការនយោបាយទេដែលអាច ហើយបញ្ហាដំណើរការនយោបាយ ខ្ញុំមិនឃើញអ្នកណាទៅដឹកនាំនោះទេ»៕ ប្រែសម្រួលៈ ណៃ តុលា
