បរទេស៖ កូនកំលោះម្នាក់បានផ្ទុះអាវុធ ដោយបានបាញ់សម្លាប់មនុស្ស ៤នាក់ រួមទាំងបាញ់សម្លាប់កូនក្រមុំ និង បាញ់បុរសម្នាក់ទៀតឱ្យរងរបួសយ៉ាងធ្ងន់ធ្ងរ មុនពេលបាញ់សម្លាប់ខ្លួនឯងក្នុង ពិធីមង្គលការខ្លួនឯងកាលពីយប់ថ្ងៃសៅរ៍។
យោងតាមសារព័ត៌មាន បាងកក ប៉ុស្តិ៍ របស់ថៃ ចេញផ្សាយនៅថ្ងៃទី២៧ ខែវិច្ឆិកា ឆ្នាំ២០២៣ បានឱ្យដឹងថា អ្នកបាញ់ប្រហារត្រូវបាន គេកំណត់អត្តសញ្ញាណថា ឈ្មោះ Chaturong Suksuk ជាអតីតទាហាន និងអត្តពលិកប៉ារ៉ាឡាំពិក។
ឧបទ្ទវហេតុបាញ់ប្រហារនេះ បានកើតឡើងនៅម៉ោងប្រហែល ១១ និង២៥នាទី យប់នៅផ្ទះមួយក្នុងសង្កាត់ Wang Nam Khieo នៃខេត្ត Nakhon Ratchasima ដែលជាកន្លែងពិធីរៀបអាពាហ៍ពិពាហ៍មួយរបស់ឈ្មោះ Chaturong អាយុ ២៩ ឆ្នាំ និងកូនក្រមុំឈ្មោះ Kanchana Pachunthuek អាយុ ៤៤ ឆ្នាំ។
នៅព្រឹកថ្ងៃសៅរ៍នេះ ពិធីមង្គលការមួយត្រូវបានធ្វើឡើង នៅគេហដ្ឋានរវាងលោក Chaturong និង Kanchana។ អ្នកទាំងពីរបានរស់នៅជាមួយគ្នា ជាប្តីប្រពន្ធអស់រយៈពេល៣ឆ្នាំ មុនសម្រេចចិត្តរៀបការ ។
ពិធីរៀបអាពាហ៍ពិពាហ៍មួយ ត្រូវបានធ្វើឡើងនៅយប់នោះ។ ក្នុងពិធីនោះ ភ្ញៀវនិងសាច់ញាតិបានកត់សម្គាល់ថា Chaturong ហាក់មិនសប្បាយចិត្តឡើយ។ នៅយប់ជ្រៅ លោក Chaturong បានចេញពីពិធីហើយទៅកាន់រថយន្តរបស់គាត់។ មួយសន្ទុះក្រោយមក គាត់បានត្រឡប់មកវិញ ដោយកាន់កាំភ្លើងខ្លី ហើយបានបាញ់សម្លាប់កូនក្រមុំ ម្តាយ ប្អូនស្រី និងភ្ញៀវម្នាក់ ចំណែក ភ្ញៀវម្នាក់ទៀតរងរបួសធ្ងន់។
Chaturong បន្ទាប់មកបាញ់សម្លាប់ខ្លួនឯង ហើយបានស្លាប់ភ្លាមៗ។
ប៉ូលិសបាននិយាយថា គ្រាប់កាំភ្លើងចំនួន ១១ គ្រាប់ត្រូវបានរកឃើញពីកន្លែង កើតហេតុនៃការបាញ់ប្រហារ ៕
ប្រែសម្រួលៈ ណៃ តុលា
