តូក្យូ ៖ ប្រភពរដ្ឋាភិបាលបានឲ្យដឹងថា នាយករដ្ឋមន្ត្រីជប៉ុន លោក ហ្វូមីអូ គីស៊ីដា កំពុងរៀបចំជួបជាមួយប្រធានាធិបតីអ៊ីស្រាអែល លោក Isaac Herzog នៅខាងក្រៅសន្និសីទ អង្គការសហប្រជាជាតិ ស្តីពីការប្រែប្រួលអាកាសធាតុ ចំពេលប្រទេសមជ្ឈិមបូព៌ាមានសង្រ្គាមជាមួយក្រុមហាម៉ាស។
ប្រភពបានឲ្យដឹងថា ប្រសិនបើដឹង វានឹងក្លាយជាលើកទីមួយ សម្រាប់នាយករដ្ឋមន្ត្រីជប៉ុន ក្នុងការជួបពិភាក្សាជាមួយមេដឹកនាំនយោបាយអ៊ីស្រាអែល ចាប់តាំងពីអ៊ីស្រាអែល ត្រូវបានវាយប្រហារ ដោយក្រុមសកម្មប្រយុទ្ធប៉ាឡេស្ទីន កាលពីថ្ងៃទី០៧ ខែតុលា ដែលបង្កឱ្យមានជម្លោះទ្រង់ទ្រាយធំ។
លោក គីស៊ីដា ទំនងជាមិនទៅបំពេញ ទស្សនកិច្ចនៅអ៊ីស្រាអែលនោះទេ ក្នុងដំណើររបស់លោក ទៅកាន់មជ្ឈិមបូព៌ា ជាកន្លែងដែលលោក នឹងចូលរួមក្នុងការប្រជុំកម្រិតកំពូល នៃសម័យប្រជុំលើកទី២៨ នៃសន្និសីទភាគីនៃអនុសញ្ញាក្របខ័ណ្ឌអង្គការសហប្រជាជាតិ ស្តីពីការប្រែប្រួលអាកាសធាតុ ដែលត្រូវបានគេស្គាល់ថា COP28 នៅសហរដ្ឋអាមេរិក។
នៅក្នុងកិច្ចពិភាក្សាដែលរំពឹង ទុករបស់ពួកគេ លោក គីស៊ីដា ត្រូវបានគេរំពឹងថា នឹងស្នើឱ្យលោក Herzog ធ្វើការលើការបន្ធូរបន្ថយភាព តានតឹងជុំវិញតំបន់ហ្គាហ្សា របស់ប៉ាឡេស្ទីន ដែលគ្រប់គ្រងដោយក្រុមហាម៉ាស ដោយបង្ហាញពីបំណងប្រាថ្នារបស់ប្រទេសជប៉ុន សម្រាប់ស្ថានភាពនៅមជ្ឈិមបូព៌ាឱ្យប្រសើរឡើង ។
ប្រទេសជប៉ុន ដែលក្រីក្រ ធនធានជាប្រពៃណីបានបន្ត “ការទូតដែលមានតុល្យភាព” រវាងអ៊ីស្រាអែល និង ប្រទេសមូស្លីមនៅមជ្ឈិមបូព៌ា ដោយសារប្រទេសនេះ ពឹងផ្អែកខ្លាំងលើប្រេងឆៅពីតំបន់ នេះបើយោងតាមការចុះផ្សាយរបស់ទីភ្នាក់ងារ សារព័ត៌មានក្យូដូជប៉ុន។
មានការរំពឹងទុកយ៉ាងទូលំទូលាយថា លោក គីស៊ីដា អាចនឹងទៅបំពេញ ទស្សនកិច្ចនៅអ៊ីស្រាអែល ក្នុងអំឡុងដំណើររបស់លោក ទៅកាន់ប្រទេសអារ៉ាប់រួម ។ ទោះបីជាយ៉ាងណាក៏ដោយ ប្រធានខុទ្ទកាល័យលោក Hirokazu Matsuno បានឲ្យដឹងនៅក្នុងសន្និសីទ សារព័ត៌មានមួយកាលពីថ្ងៃពុធថា នាយករដ្ឋមន្ត្រីមិនមាន “គម្រោង” ដើម្បីធ្វើដំណើរទៅទីនោះទេ ៕
ប្រែសម្រួល ឈូក បូរ៉ា
