វ៉ាស៊ីនតោន៖ សេតវិមានបានឲ្យដឹងថា ប្រធានាធិបតីសហរដ្ឋអាមេរិកលោក ចូ បៃដិន បានអញ្ជើញសមភាគី អ៊ុយក្រែនលោក វូឡូឌីមៀ ហ្សេឡិនស្គី សម្រាប់កិច្ចពិភាក្សាកាលពីថ្ងៃអង្គារ ក្នុងទីក្រុងវ៉ាស៊ីនតោន ខណៈដែលគណបក្សប្រជាធិបតេយ្យ របស់មេដឹកនាំសហរដ្ឋអាមេរិក កំពុងតស៊ូ ដើម្បីធ្វើឱ្យមានវឌ្ឍនភាព ក្នុងការចរចាសភា ដើម្បីទទួលបានជំនួយបន្ថែម សម្រាប់ប្រទេសដែលហែកហួរ ដោយសង្រ្គាម។
អ្នកនាំពាក្យសេតវិមានលោកស្រី Karine Jean-Pierre បានឲ្យដឹងនៅក្នុងសេចក្តីថ្លែងការណ៍មួយថា “នៅពេលដែលប្រទេសរុស្ស៊ីបង្កើន ការវាយប្រហារមីស៊ីល និងយន្តហោះដ្រូនប្រឆាំងនឹង អ៊ុយក្រែន មេដឹកនាំនឹងពិភាក្សា អំពីតម្រូវការបន្ទាន់ របស់អ៊ុយក្រែន និងសារៈសំខាន់ នៃការបន្តគាំទ្រ របស់សហរដ្ឋអាមេរិកនៅពេលនេះ” ។
ការិយាល័យរបស់លោក ហ្សេឡិនស្គី បានឲ្យដឹងថា លោកនឹងមកដល់ទីក្រុងវ៉ាស៊ីនតោន នៅថ្ងៃចន្ទ ហើយប្រធានបទសំខាន់ៗនៃការពិភាក្សានឹងរួមបញ្ចូល ការបន្តកិច្ចសហប្រតិបត្តិការ លើវិស័យការពារជាតិ រវាងប្រទេសទាំងពីរ “គម្រោងរួមជាក់លាក់ជាពិសេស លើការផលិតអាវុធ និងប្រព័ន្ធការពារដែនអាកាស” និងការសម្របសម្រួល នៅឆ្នាំ២០២៤ ។
ដំណើរទស្សនកិច្ចរបស់លោក កើតឡើងនៅពេលដែលសង្រ្គាមរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីនហាម៉ាស បានបង្វែរការយកចិត្តទុកដាក់ពីការឈ្លានពានរបស់រុស្ស៊ី លើអ៊ុយក្រែន ខណៈដែលជោគវាសនា នៃសំណើថវិកាបន្ថែមចំនួន ១០៦ពាន់លានដុល្លាររបស់លោក បៃដិន ទៅកាន់សភា ដែលមានជំនួយចំនួន ៦១,៤ ពាន់លានដុល្លារ សម្រាប់ទីក្រុងគៀវ នៅតែស្ថិតក្នុងផែនការដដែល។
លោក បៃដិន និងមន្ត្រីសេតវិមាន បានបង្កើនការជូនដំណឹងជាច្រើនសប្តាហ៍ អំពីការផ្តល់មូលនិធិសម្រាប់អ៊ុយក្រែន ដែលកំពុងដំណើរការ ដែលនឹងចូលទៅក្នុងដៃ របស់ប្រធានាធិបតីរុស្ស៊ីលោក វ្លាឌីមៀ ពូទីន៕
ប្រែសម្រួល ឈូក បូរ៉ា
