បរទេស៖ក្រសួងការពារជាតិកូរ៉េខាងជើង បានចោទប្រកាន់សហរដ្ឋអាមេរិក និងកូរ៉េខាងត្បូង ពីការរៀបចំ សម្រាប់សង្គ្រាមនុយក្លេអ៊ែរ ដោយព្រមានថាការប្រើប្រាស់កម្លាំងណាមួយប្រឆាំងនឹង កូរ៉េខាងជើង នឹងត្រូវបាន ឆ្លើយតបជាមុន និងដោយការបំផ្លិចបំផ្លាញ។
យោងតាមការដកស្រង់របស់ RT សេចក្តីថ្លែងការណ៍របស់ក្រសួង បានធ្វើឡើងបន្ទាប់ពី កងកម្លាំងរបស់ក្រុងព្យុងយ៉ាង បានបាញ់សាកល្បងកាំជ្រួចផ្លោង មួយគ្រាប់ កាលពីពេលថ្មីៗនេះ។
មីស៊ីលនេះត្រូវបានបាញ់ចេញ ពីឆ្នេរសមុទ្រភាគខាងកើត របស់ប្រទេសកូរ៉េខាងជើង កាលពីថ្ងៃអាទិត្យ ហើយបានធ្លាក់ចូល ទៅក្នុងសមុទ្រ២០នាទី បន្ទាប់ពីការផ្ទុះ នេះបើយោងតាមឆ្មាំឆ្នេរសមុទ្រជប៉ុន បានធ្វើសេចក្តីរាយការណ៍។
ភ្លាមៗបន្ទាប់ពីការបាញ់បង្ហោះ ក្រសួងការពារជាតិបានចេញសេចក្តីថ្លែងការណ៍មួយ ដោយចោទប្រកាន់យោធាអាមេរិក និងកូរ៉េខាងត្បូង ពីការបង្កើនការត្រៀមរៀបចំ សម្រាប់សង្គ្រាមនុយក្លេអ៊ែរ ដោយលើកឡើងពីកិច្ចប្រជុំ នៃក្រុមប្រឹក្សានុយក្លេអ៊ែរអាមេរិក-កូរ៉េខាងត្បូង នៅទីក្រុងវ៉ាស៊ីនតោន កាលពីថ្ងៃសុក្រកន្លងមកផងដែរ។
ទោះបីជាយ៉ាងណាក្តីជារឿយៗសេតវិមាន តែងតែបាននិយាយថា សហរដ្ឋអាមេរិកនឹងប្រើប្រាស់ សមត្ថភាពពេញលេញ របស់សហរដ្ឋអាមេរិក រួមទាំងនុយក្លេអ៊ែរ ដើម្បីការពារកូរ៉េខាងត្បូង ពីការវាយប្រហារ ដោយភាគខាងជើង៕
ប្រែសម្រួល៖ស៊ុនលី
