បរទេស ៖ យោងតាមការចេញ ផ្សាយរបស់ RT ប្រធានាធិបតីរុស្ស៊ី លោក Vladimir Putin នៅល្ងាចថ្ងៃពុធ បានជួបពិភាក្សាជាមួយរដ្ឋមន្ត្រី ការបរទេសឥណ្ឌា លោក Subrahmanyam Jaishankar ដែលកំពុងបំពេញទស្សនកិច្ចផ្លូវការ រយៈពេលបួនថ្ងៃនៅប្រទេសរុស្ស៊ី។
ក្នុងជំនួបនៅវិមានក្រឹមឡាំង លោក Putin បានអញ្ជើញនាយករដ្ឋមន្ត្រី ឥណ្ឌាលោក Narendra Modi មកបំពេញទស្សនកិច្ចនៅរុស្ស៊ី ដើម្បីពិភាក្សាលម្អិត លើបញ្ហាទ្វេភាគី ក៏ដូចជាការអភិវឌ្ឍន៍ភូមិសាស្ត្រ នយោបាយ រួមទាំងជម្លោះអ៊ុយក្រែនផងដែរ។
នេះបើតាមការប្រកាសរបស់វិមានក្រឹមឡាំង ៖យើងនឹងរីករាយដែលបានឃើញមិត្ត របស់យើងនាយករដ្ឋមន្ត្រី Modi នៅប្រទេសរុស្ស៊ី។ យើងនឹងអាចពិភាក្សាអំពីបញ្ហាបច្ចុប្បន្នទាំងអស់ និងនិយាយអំពីលទ្ធភាព សម្រាប់ការអភិវឌ្ឍទំនាក់ទំនងរុស្ស៊ី-ឥណ្ឌា។ យើងមានការងារជាច្រើននៅខាងមុខជាមួយគ្នា។
នៅព្រឹកថ្ងៃដដែល លោក Jaishankar បានប្រាប់ប្រព័ន្ធផ្សព្វផ្សាយ នៅទីក្រុងមូស្គូថា លោកមានទំនុកចិត្តយ៉ាងខ្លាំង ចំពោះទំនៀមទម្លាប់ នៃកិច្ចប្រជុំកំពូលទ្វេភាគីប្រចាំឆ្នាំ រវាងមេដឹកនាំនៃប្រទេសទាំងពីរ ដែលជឿជាក់ថានឹងអាចបន្តធ្វើឡើងវិញនៅចាប់ពីឆ្នាំក្រោយនេះតទៅ៕
ប្រែសម្រួល៖ស៊ុនលី
