ហ្គាហ្សា៖ រដ្ឋាភិបាលដែលគ្រប់គ្រងដោយក្រុមហាម៉ាសនៅហ្គាហ្សា បានឲ្យដឹងនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា កងទ័ពអ៊ីស្រាអែល បានសម្លាប់ជនជាតិប៉ាឡេស្ទីនយ៉ាងហោចណាស់ ៣៥០នាក់ក្នុងរយៈពេល ៤៨ ម៉ោងកន្លងមកនេះនៅទីក្រុង Khan Younis ភាគខាងត្បូងតំបន់ហ្គាហ្សាស្ទ្រីប។
សេចក្តីថ្លែងការណ៍បានបន្ថែមថា ក្រុមគ្រូពេទ្យមិនអាចទៅដល់សាកសពរាប់សិបនាក់ ដែលនៅរាយប៉ាយតាមដងផ្លូវនោះទេ ដោយកត់សម្គាល់ថាអ្នកស្រុកត្រូវបញ្ចុះសពនៅក្នុងទីធ្លានៃមន្ទីរពេទ្យ Nasser ក្នុងទីក្រុង ដោយសារពួកគេមិនអាចយកសាកសពទៅកាន់ទីបញ្ចុះសពនៅក្នុងទីក្រុង Khan Younis បាននោះទេ។
ទន្ទឹមនឹងនេះ ក្រសួងសុខាភិបាល ដែលគ្រប់គ្រងដោយក្រុមហាម៉ាស បានឲ្យដឹងកាលពីថ្ងៃអាទិត្យថា មន្ទីរពេទ្យ Nasser ពោរពេញទៅដោយកាកសំណល់វេជ្ជសាស្ត្រ ដោយសារតែការរារាំងដោយកងទ័ពអ៊ីស្រាអែល ដោយកត់សម្គាល់ថាយ៉ាងហោចណាស់អ្នករបួស និងឈឺចំនួន ៧,០០០ នាក់នៅក្នុងរង្វង់នេះ គឺត្រូវការការព្យាបាលសង្គ្រោះជីវិតជាបន្ទាន់។
សង្គមអឌ្ឍចន្ទក្រហមប៉ាឡេស្ទីន បានព្រមាននៅក្នុងសេចក្តីថ្លែងការណ៍មួយអំពីការថយចុះការផ្គត់ផ្គង់អុកស៊ីសែននៅមន្ទីរពេទ្យ Al-Amal ក្នុងទីក្រុង Khan Younis ចំពេលមានការឡោមព័ទ្ធដែលកំពុងបន្តដោយកងកម្លាំងអ៊ីស្រាអែល ដែលបានបង្កការលំបាកដល់ក្រុមគ្រូពេទ្យនៅមន្ទីរពេទ្យដើម្បីធ្វើប្រតិបត្តិការវះកាត់៕ ប្រែសម្រួល ឈូក បូរ៉ា
