បរទេស ៖ យោងតាមការចេញផ្សាយ របស់ RT នាយករដ្ឋមន្ត្រីឡាតវី Evika Silina បាននិយាយកាលពីថ្ងៃពុធថា រដ្ឋរបស់អង្គការណាតូ មិនទាន់ត្រៀម ខ្លួនសម្រាប់ការពិភាក្សា អំពីការបញ្ជូនកងទ័ពជើងគោក ទៅកាន់អ៊ុយក្រែនទេ សូម្បីតែបន្ទាប់ពីប្រទេសបារាំង បានណែនាំពីលទ្ធភាពបែបនេះកាលពីខែមុន ក៏ដោយ ។
លោកស្រីនាយករដ្ឋមន្ត្រីSilina ត្រូវបានគេដឹងថាកំពុងជួបពិភាក្សា ជាមួយនឹងអធិការបតីអាល្លឺម៉ង់ Olaf Scholz នៅទីក្រុងប៊ែរឡាំង ដែលជាផ្នែក នៃដំណើរទស្សនកិច្ចការងារទៅកាន់ប្រទេសនេះ។
លោកស្រីបន្តថា៖ទាក់ទងនឹងកងទ័ព ខ្ញុំមិនគិតថាគំនិតផ្តួចផ្តើមនេះ ត្រូវបានរៀបចំយ៉ាងល្អទេ ព្រោះការពិភាក្សាអំពីរឿងនេះមិនទាន់មានភាពចាស់ទុំនៅឡើយទេហើយបើនិយាយអំពីការបញ្ជូនកងទ័ព ខ្ញុំគិតថាយើងនៅក្នុងអង្គការណាតូ មិនទាន់ត្រៀមខ្លួនរួចរាល់ ក្នុងការធ្វើរឿងនេះទេ។
ក្រៅពីនោះលោកស្រីក៏បានចង្អុលបង្ហាញថា រដ្ឋាភិបាលទីក្រុងគៀវ មិនបានស្នើសុំឱ្យរដ្ឋណាតូបញ្ជូនកងទ័ពទេ ហើយបានសង្កត់ធ្ងន់ថា យើងត្រូវផ្តោត លើតម្រូវការ របស់អ៊ុយក្រែន មិនមែនលើអ្វី ដែលអ៊ុយក្រែន មិនស្នើសុំនោះទេ៕
ប្រែសម្រួល៖ស៊ុនលី
