ម៉ិកស៊ិក៖ បុគ្គលិកស្ថានទូតម៉ិកស៊ិក បានចាកចេញបន្ទាប់ពីម៉ិកស៊ិក បានផ្តាច់ទំនាក់ទំនងការទូតជាមួយអេក្វាឌ័រ បន្ទាប់ពីប៉ូលីសអេក្វាឌ័របានសម្រុកចូលស្ថានទូតម៉ិកស៊ិក ដើម្បីចាប់ខ្លួនអតីតអនុប្រធានាធិបតីលោក Jorge Glas ដែលត្រូវបានកាត់ទោសពីបទពុករលួយ។
ក្រសួងការបរទេសរបស់ប្រទេស ម៉ិកស៊ិក បានអះអាងថា បុគ្គលិកស្ថានទូត និងក្រុមគ្រួសាររបស់ពួកគេ កំពុងត្រឡប់ទៅម៉ិកស៊ិកវិញ នៅក្នុងការបង្ហោះនៅលើ X ដែលពីមុនត្រូវបានគេស្គាល់ថា ជាបណ្ដាញ Twitter ។
ក្រសួងបានឲ្យដឹងថា ប្រទេសជាមិត្ត និងសម្ព័ន្ធមិត្តបានគាំទ្រម៉ិកស៊ិក ក្នុងការធានាសុវត្ថិភាពរបស់ពលរដ្ឋម៉ិកស៊ិក ដោយអមដំណើរពួកគេក្នុងការធ្វើដំណើរទៅកាន់អាកាសយានដ្ឋានក្នុងរដ្ឋធានីអេក្វាឌ័រ។
ស្ថានទូតម៉ិកស៊ិកនៅអេក្វាឌ័រ “នឹងនៅតែបិទដោយគ្មានកាលកំណត់ ដូចនឹងសេវាកម្មកុងស៊ុលដែរ” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ប្រធានាធិបតីម៉ិកស៊ិក លោក Andres Manuel Lopez Obrador បានចាត់ទុកការវាយឆ្មក់ របស់ប៉ូលីសលើស្ថានទូត ម៉ិកស៊ិកថា ជាការរំលោភ លើអធិបតេយ្យភាព និងច្បាប់អន្តរជាតិ របស់ប្រទេសម៉ិកស៊ិក ហើយបានផ្តាច់ទំនាក់ទំនង ការទូតជាមួយអេក្វាឌ័រ។
លោកក៏បានណែនាំ រដ្ឋមន្ត្រីការបរទេសម៉ិកស៊ិក Alicia Barcena ឱ្យសម្របសម្រួលការវិលត្រឡប់នៃបុគ្គលិកការទូត ដែលត្រូវបានទទួលស្គាល់ នៅក្នុងប្រទេសអេក្វាឌ័រ រួមជាមួយនឹងក្រុមគ្រួសាររបស់ពួកគេ បន្ទាប់ពី “ការវាយប្រហារ ដោយហិង្សា” លើស្ថានទូតម៉ិកស៊ិក៕
ប្រែសម្រួល ឈូក បូរ៉ា
