បស្ចិមប្រទេស កំពុងធ្វើសង្រ្គាមប្រឆាំង នឹងទីក្រុងម៉ូស្គូ ដោយប្រើជនជាតិអ៊ុយក្រែន

ម៉ូស្គូៈ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានឲ្យដឹងថា ប្រទេសលោកខាងលិច កំពុងធ្វើសង្រ្គាមប្រឆាំងនឹងប្រទេសរុស្ស៊ី នៅអ៊ុយក្រែន ជាមួយនឹងការ ប្រើប្រាស់អាវុធបរទេស។

សេចក្តីថ្លែងការណ៍នេះ ធ្វើឡើងបន្ទាប់ពីរដ្ឋមន្ត្រីការបរទេសអង់គ្លេសលោក David Cameron បានធ្វើទស្សនកិច្ចនាពេលថ្មីៗនេះទៅកាន់ទីក្រុងគៀវ ដែលមន្ត្រីរូបនេះបានឲ្យដឹងថា អ៊ុយក្រែន មានសិទ្ធិប្រើប្រាស់អាវុធ របស់អង់គ្លេស ដើម្បីវាយប្រហារលើគោលដៅនានាក្នុងទឹកដីរុស្ស៊ី។

លោកស្រី Zakharova បានលើកឡើងថា អ្នកនយោបាយលោកខាងលិច បានសារភាពជាសាធារណៈថា “លោកខាងលិច កំពុងធ្វើសង្រ្គាមបើកចំហរប្រឆាំងនឹងរុស្ស៊ី នៅក្នុងដៃរបស់អ៊ុយក្រែន” ។

អ្នកនាំពាក្យវិមានក្រឹមឡាំង លោក Dmitry Peskov ក៏បានឲ្យដឹងផងដែរកាលពីថ្ងៃសុក្រថា ពាក្យរបស់លោក Cameron គឺជាសេចក្តីថ្លែងការណ៍ដ៏ គ្រោះថ្នាក់បំផុតមួយផ្សេងទៀត នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។

លោកបានលើកឡើងថា “សេចក្តីថ្លែងការណ៍ទាំងនេះ គឺជាឧទាហរណ៍នៃការកើនឡើងដោយផ្ទាល់ នៃភាពតានតឹងជុំវិញជម្លោះអ៊ុយក្រែន ដែលអាចគំរាមកំហែង ដល់សន្តិសុខអឺរ៉ុប” លោកបានបន្ថែមថាទីក្រុងម៉ូស្គូ មានការព្រួយបារម្ភយ៉ាងខ្លាំង ចំពោះវោហាសាស្ត្រ ដែលកើនឡើងនេះមកពីអ្នកតំណាងផ្លូវការ៕
ប្រែសម្រួល ឈូក បូរ៉ា