បេរូត៖ ក្រុមហេសបូឡា បានបើកការវាយប្រហារ ដោយយន្តហោះដ្រូន កាលពីថ្ងៃព្រហស្បតិ៍ ទៅលើទីបញ្ជាការយោធាអ៊ីស្រាអែល នៅតំបន់តាំងទីលំនៅ Kfar Giladi ភាគខាងជើងប្រទេសអ៊ីស្រាអែល ដោយបានអះអាងថា បណ្តាលឱ្យមានអ្នកស្លាប់ និងរបួសក្នុងចំណោមមន្ត្រីអ៊ីស្រាអែល។
ក្រុមហេសបូឡា បានឲ្យដឹងនៅក្នុង សេចក្តីថ្លែងការណ៍មួយថា ការវាយប្រហារត្រូវបានធ្វើឡើងដោយយន្តហោះដ្រូន ជាច្រើនគ្រឿង ក្នុងការសងសឹក ចំពោះការធ្វើឃាតរបស់អ៊ីស្រាអែល ទៅលើសមាជិកក្រុមហេសបូឡា ៣នាក់នៅក្នុងភូមិ Bafliyeh ភាគខាងត្បូងនៃប្រទេសលីបង់។
សេចក្តីថ្លែងការណ៍មិនបានបញ្ជាក់លម្អិតអំពីជនរងគ្រោះដែលបានអះអាងនោះទេ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ប្រភពយោធាលីបង់បានប្រាប់កាសែតស៊ិនហួ ឲ្យដឹងថាប្រព័ន្ធការពារ Iron Dome និងយន្តហោះចម្បាំង F-15 របស់អ៊ីស្រាអែល បានស្ទាក់ចាប់យន្តហោះដ្រូន ដែលកំពុងហោះហើរក្នុងរយៈកម្ពស់ទាបបំផុត នៅពេលរសៀល។
ប្រភពមិនបញ្ចេញឈ្មោះបានបន្ថែមថា កាំជ្រួចពីអាកាសទៅអាកាសមួយគ្រាប់ ដែលយន្តហោះអ៊ីស្រាអែល បាញ់សំដៅទៅលើយន្តហោះគ្មាន មនុស្សបើកបានធ្លាក់ និងផ្ទុះនៅតំបន់ជុំវិញភូមិ Khiam ភាគអាគ្នេយ៍នៃប្រទេសលីបង់ ខណៈកាំជ្រួចជាច្រើនផ្សេងទៀតត្រូវបានបាញ់ទម្លាក់ដោយ Iron Dome ទៅលើយន្តហោះដ្រូន និងបានផ្ទុះនៅក្នុងដែនអាកាស នៃតំបន់ព្រំដែននៅភាគខាងត្បូងប្រទេសលីបង់។
ប្រភពបានកត់សម្គាល់ថា អ៊ីស្រាអែលបានធ្វើការវាយប្រហារតាមអាកាសចំនួន ៥ លើក និងបានបាញ់ផ្លោងប្រមាណ ៣០ គ្រាប់លើទីតាំងជាច្រើន និងទីប្រជុំជន និងភូមិជាប់ព្រំដែននៅភាគខាងត្បូងប្រទេសលីបង់៕
ប្រែសម្រួល ឈូក បូរ៉ា
