តេអេរ៉ង់៖ ទីភ្នាក់ងារព័ត៌មាន IRIB បានរាយការណ៍ថា លក្ខខណ្ឌអាកាសធាតុធ្ងន់ធ្ងរ រួមទាំងអ័ព្ទក្រាស់ គឺជាកត្ដាទទួលខុសត្រូវចម្បង ចំពោះការធ្លាក់ឧទ្ធម្ភាគចក្រ កាលពីខែឧសភា ដែលបានបណ្តាលឲ្យលោក Ebrahim Raisi អតីតប្រធានាធិបតីអ៊ីរ៉ង់ ស្លាប់បាត់បង់ជីវិត។
អគ្គសេនាធិការនៃកងកម្លាំង ប្រដាប់អាវុធរបស់ប្រទេសអ៊ីរ៉ង់ បានចេញផ្សាយរបាយការណ៍នេះ ដោយបញ្ជាក់ថាទិដ្ឋភាពបច្ចេកទេស វិស្វកម្ម អេឡិចត្រូនិក និងផ្នែករុករករបស់ឧទ្ធម្ភាគចក្រ ត្រូវបានពិនិត្យយ៉ាងល្អិតល្អន់។ ការរកឃើញបានបញ្ជាក់ថា រាល់នីតិវិធី និងវិធានការទាំងអស់បានប្រកាន់ខ្ជាប់នូវស្តង់ដារ និងបទប្បញ្ញត្តិ ដែលបានបង្កើតឡើងមុន និងអំឡុងពេលហោះហើរ។
របាយការណ៍នេះបានច្រានចោល គម្លាតពីផ្លូវហោះហើរ ព័ត៌មានផ្លូវមិនត្រឹមត្រូវ និងការជ្រៀតជ្រែកពីខាងក្រៅ ដែលជាកត្តាក្នុងការធ្លាក់។ វាក៏បានកត់សម្គាល់ផងដែរថា អ្នកបើកយន្តហោះមិនបានរាយការណ៍ ពីស្ថានភាពសង្គ្រោះបន្ទាន់ណាមួយឡើយ ហើយការពិនិត្យកោសល្យវិច្ច័យបង្ហាញថា មិនមានភស្តុតាងនៃការវាយប្រហារ ណាមួយឡើយ។
របាយការណ៍នេះបានសន្មតថា ការធ្លាក់នេះគឺដោយសារតែ “លក្ខខណ្ឌអាកាសធាតុ និងបរិយាកាសដ៏ស្មុគស្មាញ ក្នុងអំឡុងនិទាឃរដូវ” ដែលនាំឱ្យមានការបង្កើតអ័ព្ទក្រាស់ និងបណ្តាលឱ្យឧទ្ធម្ភាគចក្រ ធ្លាក់ចូលទៅក្នុងភ្នំមួយ។
គួរបញ្ជាក់ថា លោក Raisi រួមជាមួយនឹងអ្នករួមដំណើររបស់លោក រួមទាំងអតីតរដ្ឋមន្ត្រីការបរទេសលោក Hossein Amir-Abdollahian បានស្លាប់នៅពេលដែលឧទ្ធម្ភាគចក្រ របស់ពួកគេបានធ្លាក់នៅតំបន់ភ្នំក្នុងខេត្ត East Azarbaijan កាលពីថ្ងៃទី១៩ ខែឧសភា ៕
ប្រែសម្រួល ឈូក បូរ៉ា
