បរទេស ៖ យោងតាមការចេញផ្សាយរបស់ RT ប្រធានាធិបតីជាប់ឆ្នោត របស់សហរដ្ឋអាមេរិក លោក Donald Trump បាននិយាយថា លោកមិនទាន់ បានពិភាក្សាជាមួយប្រធានាធិបតីរុស្ស៊ី លោក Vladimir Putin នៅឡើយទេ ប៉ុន្តែអ្នកទាំងពីរទំនងជានឹងនិយាយ នៅពេលខាងមុខឆាប់ៗនេះខណៈដែល លោក Putin បាននិយាយមុននេះថា លោកបានត្រៀមខ្លួនជាស្រេច ដើម្បីនិយាយជាមួយលោក Trumpដែរ។
នៅក្នុងបទសម្ភាសន៍ជាមួយ NBC News កាលពីថ្ងៃព្រហស្បតិ៍ លោក Trump បាននិយាយថា លោកបាននិយាយជាមួយ មេដឹកនាំពិភពលោក ចំនួន៧០នាក់ចាប់ តាំងពីជ័យជម្នះការបោះឆ្នោតរបស់គាត់ ប៉ុន្តែលោក Putin មិនស្ថិតក្នុង ចំណោមពួកគេទេ ហើយទោះជាយ៉ាងណា លោកបានបន្ថែមថា ខ្ញុំគិតថាយើងនឹងនិយាយក្នុងពេលឆាប់បំផុតខាងមុខនេះ។
ថ្លែងនៅក្នុងកិច្ចប្រជុំ នៃក្លឹបពិភាក្សាអន្តរជាតិ Valdai នៅទីក្រុង Sochi ភាគខាងត្បូងនៃប្រទេសរុស្ស៊ី ប្រហែលមួយម៉ោង មុននេះ លោក Putin បានអបអរសាទរ ចំពោះជ័យជម្នះរបស់លោក Trump ហើយបាននិយាយថា លោកបើកចំហ សម្រាប់ការហៅទូរស័ព្ទជាមួយប្រធានាធិបតីជាប់ឆ្នោតដោយក្នុងនោះ លោក Putin ក៏បានបន្ថែមដែរថានឹងមិនស្ថិតនៅលើខ្ញុំដើម្បីហៅទូរស័ព្ទជាមួយគាត់ដោយខ្លួនឯងនោះទេ។
គួរឲ្យដឹងដែរថាពេញមួយយុទ្ធនាការ របស់គាត់ លោក Trump បានសន្យាថានឹងបញ្ចប់ជម្លោះ រុស្ស៊ី-អ៊ុយក្រែនយ៉ាង ឆាប់រហ័ស ប្រសិនបើជាប់ឆ្នោត ហើយបាននិយាយថា លោកនឹងពិភាក្សា ជាមួយទាំងលោក Putin និងមេដឹកនាំអ៊ុយក្រែន លោក Vladimir Zelensky ដើម្បីសម្រេចបាននូវគោលដៅនេះ។
លោក Trump បានផ្តល់ព័ត៌មានលម្អិតបន្ថែមមួយចំនួន ហើយទីក្រុងមូស្គូបានឆ្លើយតបយ៉ាងប្រយ័ត្នប្រយែង ដោយអ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីខែមុនថា លោកមិន គិតថាមានដាវវេទមន្ត ដែលអាចបញ្ឈប់ការ ប្រយុទ្ធគ្នាត្រឹមពេល វេលាមួយយប់នោះទេ៕
ប្រែសម្រួល៖ស៊ុនលី
