បរទេស៖ យោងតាមការចេញផ្សាយរបស់ RT អភិបាលក្រុងង លោក Vyacheslav Gladkov បាននិយាយនៅលើ Telegram កាលពីថ្ងៃសុក្រថា មនុស្សពីរនាក់បានស្លាប់ នៅក្នុងការវាយប្រហារដោយ យន្តហោះគ្មានមនុស្សបើករបស់អ៊ុយក្រែន ជាបន្តបន្ទាប់ទៅលើតំបន់មួយចំនួន នៅក្នុងទឹកដីព្រំដែន Belgorod របស់រុស្ស៊ី។
លោកGladkov បាននិយាយថា ការវាយប្រហារបានសម្លាប់ជនស៊ីវិលម្នាក់ និងរបួសធ្ងន់ម្នាក់ទៀតនៅក្នុងភូមិតូចមួយ ដែលមានចម្ងាយប្រហែល១៨គីឡូម៉ែត្រពីព្រំដែនរុស្ស៊ីជាមួយអ៊ុយក្រែន។ លោកបានបន្ថែមថា ការវាយប្រហារពីរផ្សេងទៀតលើការតាំងលំនៅផ្សេងទៀត ក៏បានធ្វើឲ្យជនស៊ីវិលម្នាក់រងរបួសដែរ។
ល្ងាចថ្ងៃដដែល យន្តហោះដ្រូនរបស់អ៊ុយក្រែន បានវាយប្រហារទៅលើរថយន្តមួយគ្រឿង សម្លាប់បុគ្គលិកនៃក្រុមហ៊ុនសន្តិសុខ ក្នុងតំបន់ដែលផ្តល់សេវាកម្មការពារទ្រព្យសម្បត្តិ ។
លោក Gladkov បាននិយាយថា ក្រុមការងារបួននាក់របស់គាត់ដែលនៅក្បែរនោះ នៅពេលនៃការវាយប្រហារក៏បានរងរបួសផងដែរ ហើយត្រូវបានបញ្ជូនទៅមន្ទីរពេទ្យ។
គួរឲ្យដឹងដែរថាប្រហែលពាក់កណ្តាល នៃការវាយប្រហារដោយយន្តហោះគ្មានមនុស្សបើកផ្សេងទៀត ដែលបានចាប់ផ្តើមដោយកងកម្លាំង របស់ទីក្រុងគៀវកាលពីថ្ងៃសុក្របាន បណ្តាលឱ្យខូចខាតទ្រព្យសម្បត្តិជាច្រើន។ យ៉ាងណាក្តីយោងតាមទិន្នន័យ ដែលផ្តល់ដោយអាជ្ញាធរមូលដ្ឋាន ការវាយប្រហារនេះត្រូវបានគេជឿជាក់ថា គឺបានផ្តោតលើហេដ្ឋារចនាសម្ព័ន្ធស៊ីវិល ផ្ទះឯកជន និងរចនាសម្ព័ន្ធពាណិជ្ជកម្ម ព្រមទាំងយានយន្តផងដែរ៕
ប្រែសម្រួល៖ ស៊ុន លី
