ព័ត៌មានជាតិ

គិតត្រឹមខែសីហា គម្រោងធ្វើឲ្យប្រសើរឡើងវិញ កំណាត់ផ្លូវជាតិលេខ៥ សម្រេចបានប្រមាណ ៤២,៩៩%

ភ្នំពេញ ៖ ក្រសួងសាធារណការ និងដឹកជញ្ជូន បានឲ្យដឹងថា គិតត្រឹមខែសីហា ឆ្នាំ២០២០ គម្រោងធ្វើឲ្យប្រសើរឡើងវិញកំណាត់ផ្លូវជាតិលេខ ៥ មានប្រវែងសរុបចំនួន ៣៦៦ គីឡូម៉ែត្រ សម្រេចបានប្រមាណ ៤២,៩៩% ហើយ ដោយឆ្លងកាត់ខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ។

យោងតាមគេហទំព័រហ្វេសប៊ុករបស់ ក្រសួងសាធារណការ នៅថ្ងៃទី១ ខែកញ្ញា ឆ្នាំ២០២០ បានឲ្យដឹងថា គម្រោងធ្វើឲ្យប្រសើរឡើងវិញ កំណាត់ផ្លូវជាតិលេខ៥ ត្រូវបានបែងចែកជា ៣ផ្នែកធំៗ រួមមាន៖ ផ្នែកខាងជើង (បាត់ដំបង-សិរីសោភ័ណ) មានប្រវែងសរុប ៨៤,៧៤ គីឡូម៉ែត្រ ផ្នែកកណ្តាល (ធ្លាម្អម-បាត់ដំបង) មានប្រវែងសរុប ១៤៦,០៤គីឡូម៉ែត្រ និងផ្នែកភាគខាងត្បូង (ព្រែកក្តាម ខេត្តកណ្តាល-ធ្លាម្អម ខេត្តពោធិ៍សាត់) មានប្រវែងសរុប ១៣៥,២៤គីឡូម៉ែត្រ។ ដោយមានការពង្រីកកំណាត់ផ្លូវជាតិមានស្រាប់ពី២គន្លងទៅ៤គន្លង ទទឹង២៣ម៉ែត្រ ជាប្រភេទផ្លូវបេតុងកៅស៊ូ (AC) និងមានសួនច្បារចំកណ្តាល។

សូមបញ្ជាក់ដែរថា កំណាត់ផ្លូវជាតិលេខ៥ មាន សារៈសំខាន់ណាស់សម្រាប់ការដឹកជញ្ជូន នៅក្នុ ងស្រុក ក៏ដូចជាការតភ្ជាប់វិស័យ ដឹកជញ្ជូន ក្នុង បណ្ដាប្រទេស ជា សមាជិក អាស៊ាន និង មហាអនុតំបន់មេគង្គ ហើយក៏ ត្រូវ បាន ចាត់ ទុក ថាជាផ្នែក មួយ នៃអាស៊ានហាយវ៉េលេខ ១(Asean Highway 1) ប្រចាំតំបន់អាស៊ីអាគ្នេយ៍ផងដែរ៕

To Top