ភ្នំពេញ ៖ ដើម្បីពង្រឹងការងារគ្រប់គ្រងជនបរទេស ឲ្យមានប្រសិទ្ធិភាព កាន់តែប្រសើរឡើងថែមទៀត នាយឧត្តមសេនីយ៍ គៀត ច័ន្ទថារិទ្ធ អគ្គនាយកដ្ឋានអន្តោប្រវេសន៍ បានណែនាំដល់អង្គភាពជំនាញ ត្រូវធ្វើយ៉ាងណាពង្រឹងផ្នែកបច្ចេកទេស ការផ្ទៀងផ្ទាត់វត្តមានជនបរទេស ចេញ-ចូល កម្ពុជា។ យោងតាមគេហទំព័ររបស់ អគ្គនាយកដ្ឋានអន្តោប្រវេសន៍។
ក្នុងកិច្ចប្រជុំ ស្ដាប់របាយការណ៍ ស្ដីពីការងារគ្រប់គ្រងវត្តមានជនបរទេស ដែលស្នាក់នៅកម្ពុជា តាមរយៈការពន្យាទិដ្ឋការ កាលពីថ្ងៃទី២៣ ខែកញ្ញា ឆ្នាំ២០២០លោក គៀត ច័ន្ទថារិទ្ធ បានថ្លែងថា នាពេលបច្ចុប្បន្ននេះ ការគ្រប់គ្រងជនបរទេសមិនមែនអន្តោប្រវេសន្ត មានភាពងាយស្រួលបន្តិច ដោយសារតែ អគ្គនាយកដ្ឋានអន្តោប្រវេសន៍ បានបង្កើតឡើងនូវប្រព័ន្ធគ្រប់គ្រងទិន្នន័យ FPCS ដែលអាចឲ្យដឹងពីទិន្នន័យជនបរទេសស្នាក់នៅប្រទេសកម្ពុជា។
លោកបន្ដថា ប៉ុន្តែទោះជាយ៉ាងណាក៏ដោយ ការគ្រប់គ្រងជនបរទេសដែលស្នាក់នៅក្នុងប្រទេស មានរយៈពេលយូរ នៅតែមានបញ្ហាខ្លះៗ ដូចជាបញ្ហាបច្ចេកទេសកត់ត្រាវត្តមាន និងការបំពេញបែបបទឯកសារសុក្រត្យតាមច្បាប់ជាដើម។
លោកបញ្ជាក់ថា “(ខ្ញុំ) សូមណែនាំដល់អង្គភាពជំនាញត្រូវធ្វើយ៉ាងណាពង្រឹងផ្នែកបច្ចេកទេស ការផ្ទៀងផ្ទាត់វត្តមានជនបរទេសដែលចេញ ចូលប្រទេសកម្ពុជា និងជាពិសេស គឺទិន្នន័យជនបរទេសដែលត្រូវបានផ្តល់ទិដ្ឋការស្នាក់នៅយូរ”។
ឆ្លៀតឱកាសនោះ អគ្គនាយកដ្ឋានអន្តោប្រវេសន៍
ក៏បានបញ្ជាក់បន្ថែមថា ជាមួយនេះត្រូវពង្រឹងឡើងវិញ នូវបែបបទនីតិវិធី ផ្អែកទៅតាមច្បាប់ក្នុងការផ្តល់ទិដ្ឋការស្នាក់នៅយូរ របស់ជនបរទេស ដោយផ្អែកលើគោលការណ៍ផ្តល់ផលប្រយោជន៍ ដល់ប្រទេសជាតិ៕
