ព័ត៌មានជាតិ

ក្រុមអង្កេតតាមដានសត្វព្រៃ រកឃើញសំបុកសត្វត្រយងយក្ស ១សំបុក ក្នុងរដូវពងកូន ឆ្នាំ២០២០

ភ្នំពេញ ៖ អង្គការសមាគមអភិរក្សសត្វព្រៃ (WCS) បានឲ្យដឹងថា ក្រុមអង្កេតតាមដានសត្វព្រៃ បានរកឃើញសំបុកសត្វត្រយងយក្ស ចំនួន១សំបុក ក្នុងរដូវពងកូន ឆ្នាំ២០២០ នៅដែនជម្រកសត្វព្រៃកែវសីមា ខេត្តមណ្ឌលគិរី។

បើយោងតាមគេហទំព័រហ្វេសប៊ុករបស់ WCS នៅថ្ងៃទី២៨ ខែកញ្ញា ឆ្នាំ២០២០ បានបញ្ជាក់ថា សត្វត្រយងយក្ស ឬឪលើក (Giant ibis) មានវត្តមានតែនៅក្នុងប្រទេសកម្ពុជាប៉ុណ្ណោះ និងជាបក្សីជាតិតំណាងឲ្យកម្ពុជា។

WCS បន្ដថា សត្វត្រយងយក្សជាប្រភេទជិតផុតពូជបំផុត ហើយចំនួនរបស់វាមាននៅសេសសល់ប្រហែល ២០០ ឬ៣០០ក្បាលប៉ុណ្ណោះ នៅក្នុងប្រទេសកម្ពុជា។ កាលពីឆ្នាំ ២០១៩ ប្រជាសហគមន៍បានរកឃើញសំបុកត្រយងយក្សចំនួន ៣សំបុ កនៅក្នុងដែនជម្រកសត្វព្រៃកែវសីមា និងបានយាមការពាររហូតដល់កូនត្រយងយក្ស២ក្បាល បានញាស់ហើរចេញពីសំបុកដោយសុវត្ថិភាព។

ជាងនេះទៅទៀត អង្គការសមាគមអភិរក្សសត្វព្រៃ (WCS) បានអះអាងថា ក្រុមអង្កេតតាមដានសត្វព្រៃ នឹងបន្តសហការជាមួយសហគមន៍មូលដ្ឋាន ដើម្បីការពារនិងរុករកសំបុកសត្វប្រភេទនេះ បន្ថែមទៀត៕

ដោយ ៖ អេង ប៊ូឆេង

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top