ព័ត៌មានជាតិ

ពលរដ្ឋជិត២ពាន់គ្រួសារ រងគ្រោះដោយជំនន់ទឹកភ្លៀង ត្រូវអាជ្ញាធរខេត្តបាត់ដំបង ជួយសង្គ្រោះទៅទីទួលសុវត្ថិភាព

ភ្នំពេញ៖ក្រុមប្រជាពលរដ្ឋ ដែលបានរងគ្រោះ ដោយជំនន់ទឹកភ្លៀងលិចផ្ទះសម្បែង ក្នុងរយៈកាលប៉ុន្មានថ្ងៃនេះ ត្រូវបានអាជ្ញាធរខេត្ត រួមទាំងកងកម្លាំងនានា ជួយសង្គ្រោះ នាំទៅកាន់ទីទួលសុវត្ថិភាព ប្រមាណជិត២ពាន់គ្រួសារ។ នេះបើយោងតាមរដ្ឋបាល ខេត្តបាត់ដំបង។

នាកិច្ចសម្ភាសន៍ ជាមួយអ្នកសារព័ត៌មាន ក្នុងពេលលោក ងួន រតនៈ អភិបាលខេត្តបាត់ដំបង ចុះពិនិត្យស្ថានភាពទឹកជំនន់ ក្នុងឃុំបាយដំរ៉ាំ ស្រុកបាណន់ នៅរសៀលថ្ងៃទី១១ ខែតុលា ឆ្នាំ២០២០បានថា ស្ទឹងធំៗក្នុងខេត្តបាត់ដំបង មានស្ទឹងសង្កែ ស្ទឹងបវេល និងស្ទឹងដូនទ្រី ទឹកជំនន់បានកើតឡើងព្រមៗគ្នា និងបណ្ដាលឲ្យមានការ លិចលង់ផ្ទះសម្បែង ផលដំណាំ រួមទាំងហេដ្ឋារចនាសម្ព័ន្ធផ្សេងៗ នៅក្នុងក្រុងបាត់ដំបង និងស្រុកមួយចំនួន។

លោកបានបន្តថា ចំពោះបញ្ហាជំនន់ទឹកភ្លៀងនេះ អាជ្ញាធរខេត្តរួមទាំងកងកម្លាំងទាំង៣ បានជួយសង្គ្រោះពលរដ្ឋ ដែលត្រូវទឹកលិចលង់ផ្ទះសម្បែង មិនមានបោះបង់អ្នកណាម្នាក់ ហើយអាជ្ញាធរ ក៏កំពុងបន្តជួយសង្គ្រោះ អ្នកកំពុងលិចផ្ទះ នៅក្នុងតំបន់មួយចំនួនទៀត។

ប្រជាពលរដ្ឋរស់នៅឃុំឈើទាល ស្រុកបាណន់ បានលើកឡើងថា ជារៀងរាល់ឆ្នាំ នៅក្នុងតំបន់ពួកគាត់ គឺមានទឹកជំនន់ឡើងរាល់ឆ្នាំ ព្រោះថានៅជិតស្ទឹងសង្កែ ប៉ុន្តែនៅឆ្នាំនេះ ទឹកហាក់ឡើងខ្លាំងខុសប្លែក រហូតដល់លិចផ្ទះ និងត្រូវបានអាជ្ញាធរខេត្ត រួមទាំងកងកម្លាំងនានា បានជួយសង្គ្រោះ នាំមកកាន់ទីទួលសុវត្ថិភាព ដោយមិនមានអ្នកណាម្នាក់ គ្រោះថ្នាក់ដល់ជីវិត ដោយសារបញ្ហាទឹកជំនន់នេះទេ។

គួរបញ្ជាក់ថា នាចុងរដូវវស្សា ក្នុងឆ្នាំ២០២០នេះ នៅខេត្តបាត់ដំបង បានជួបបញ្ហាគ្រោះទឹកជំនន់ នៅតាមបណ្ដាស្រុកមួយចំនួន មានស្រុករុក្ខគិរី ស្រុកមោងឫស្សី ស្រុកសង្កែ ស្រុកឯកភ្នំ ស្រុកបាណន់ ស្រុកសំឡូត ស្រុកកំរៀង ស្រុកភ្នំព្រឹក ស្រុកសំពៅលូន ស្រុកបវេល ក្នុងក្រុងបាត់ដំបង និងស្រុកមួយចំនួនទៀត ដោយគ្រោះធម្មជាតិនេះ ធ្វើឲ្យប៉ះពាល់ដល់ផ្ទះពលរដ្ឋជាច្រើនពាន់គ្រួសារ ដំណាំស្រូវជាច្រើនហិកតា រួមទាំងហេដ្ឋា រចនាសម្ព័ន្ធមួយចំនួន ខណៈពេលនេះ ក៏មានស្រុកខ្លះទឹកបានស្រកបណ្ដើរៗ និងខ្លះទៀតនៅតែបន្តលិចលង់៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top