ភ្នំពេញ ៖ បន្ទាប់ពីលេចឡើង នូវព័ត៌មានមួយចំនួន ចុះផ្សាយថា លោក អូន ព័ន្ធមុនីរ័ត្ន ឧបនាយករដ្ឋមន្ដ្រី រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ នឹងធ្វើជាបេក្ខជននាយករដ្ឋមន្ដ្រី ដ៏មានសក្តានុពលនោះ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានបកស្រាយនិងបញ្ជាក់ត្រឡប់ទៅវិញថា ពេលនេះមិនទាន់មានអ្នកណា ជំនួសតំណែងសម្ដេចបានឡើយ ។
ក្នុងពិធីជួបសំណេះសំណាល និងពិនិត្យលទ្ធផលការងាររបស់ សមាជិកក្រុមមេធាវីរាជរដ្ឋាភិបាល និងមេធាវីស្ម័គ្រចិត្ត សម្តេចតេជោ សរុបចំនួន១៥៣នាក់ នាព្រឹកថ្ងៃទី២៥ ខែវិច្ឆិកា ឆ្នាំ២០២០ នៅវិមានសន្ដិភាព សម្ដេចតេជោ ហ៊ុន សែន មានប្រសាសន៍ថា «ព្រឹកនេះបានលេចឡើងនូវអត្ថបទ ដែលជាអតីតអ្នកសរសេរអត្ថបទឲ្យ ខេមបូឌាលី ចេញមកថា អូន ព័ន្ធមុនីរ័ត្ន បានលេចឡើង ជាបេក្ខជននាយករដ្ឋមន្ដ្រី ដ៏មានសក្តានុពលណាស់ ។ អីចឹងបើ ហ៊ុន សែន កំពុងធ្វើ (នាយករដ្ឋមន្ដ្រី) អ្នកណាមកដណ្ដើមពី ហ៊ុន សែន ទៅរួច បើនៅអម ហ៊ុន សែន បាន ក៏ប៉ុន្ដែមិនទាន់ជំនួស ហ៊ុន សែន បានទេ ហ៊ុន សែន ក៏មិនទាន់ចេញដែរ» ។
សម្ដេចតេជោ បន្ដថា និយាយដូច្នេះបានសេចក្ដីថា មិនមែនមិនឲ្យមានចក្ខុវិស័យ សម្រាប់ការជ្រើសរើសមនុស្ស ដើម្បីត្រៀមរៀបចំនាយករដ្ឋមន្ដ្រីជំនាន់ក្រោយទេ ៕
ប្រវត្តិរឿង៖
The Diplomat៖ លោក អូន ព័ន្ធមុនីរ័ត្ន លេចឡើងក្នុងភាពជានាយករដ្ឋមន្រ្តីនៅថ្ងៃមុខ ដ៏មានសក្តានុពល
បរទេស៖ លោកអូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ បានលេចឡើងជាអ្នកស្នងតំណែងដ៏មានសក្តានុពលរបស់លោកនាយករដ្ឋមន្រ្តីហ៊ុនសែន បន្ទាប់ពីកិច្ចប្រជុំកំពូលអាស៊ានថ្មីៗនេះដែលលោកបានតំណាងរដ្ឋាភិបាលរបស់លោកនៅក្នុងពេលអវត្តមានមេដឹកនាំកម្ពុជា។
យោងតាមសារព័ត៌មាន The Diplomat ចេញផ្សាយនៅថ្ងៃទី២៤ ខែវិច្ឆិកា ឆ្នាំ២០២០ បានឱ្យដឹងថា លោកហ៊ុនសែន ដែលជាមេដឹកនាំយូរជាងគេបំផុតប្រចាំតំបន់ បានគ្រប់គ្រងនយោបាយកម្ពុជាអស់រយៈពេលជាង ៣៥ ឆ្នាំមកហើយ ប៉ុន្តែខកខានមិនបានចូលរួមក្នុងកិច្ចប្រជុំកំពូលអាស៊ានបន្ទាប់ពីលោកបានឈានដល់ការផ្តាច់ខ្លួន ឬធ្វើចត្តាឡីស័ក ចំពេលមានការផ្ទុះជំងឺកូវីដ១៩ បន្ទាប់ពីដំណើរទស្សនកិច្ចការទូតដែលគេហៅថា“ ព្រឹត្តិការណ៍ ៣ វិច្ឆិកា” ។
ប្រភពដែលស្និទ្ធនឹងគណបក្សប្រជាជនកម្ពុជាដែលកំពុងកាន់អំណាចបាននិយាយថា លោកអូនព័ន្ធមុនីរ័ត្ន ដែលជាអ្នកមានចំណេះដឹងដែលត្រូវបានគេគោរពយ៉ាងទូលំទូលាយនោះ ត្រូវបានជ្រើសរើសពីព្រោះលោកស្ថិតក្នុងចំណោមជម្រើសសម្រាប់ការផ្លាស់ប្តូរជាយថាហេតុណាមួយនៅក្នុងភាពជាអ្នកដឹកនាំ ដែលជាប្រភពធម្មតានៃការស្មាននៅក្នុងរាជធានី។
ការរំពឹងទុកភាគច្រើនបានផ្តោតលើកូនប្រុសពីរនាក់របស់លោកហ៊ុនសែន គឺកូនប្រុសច្បងរបស់លោកគឺលោកហ៊ុនម៉ាណែតអាយុ ៤៣ ឆ្នាំជានិស្សិតបញ្ចប់ការសិក្សានៅ West Point ខណៈពេលដែលលោកហ៊ុនម៉ានិត ជាឧត្តមសេនីយ៍កងពលខេមរភូមិន្ទអាយុ ៣៩ ឆ្នាំក៏ត្រូវបានគេលើកឡើងថាជាអ្នកស្នងសក្តានុពលផងដែរ៕
