ភ្នំពេញ ៖ ក្នុងឆមាសទី១ ឆ្នាំ២០២១ នេះ ក្រុមការងារតាមដាន អំពីការដោះស្រាយចំពោះយោបល់ ឬសំណូមពររបស់មហាជន ក្នុងគេហទំព័រហ្វេសប៊ុករបស់ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ដោះស្រាយចំនួន២៩៥ករណី និងកំពុងដោះស្រាយ ចំនួន៤៣៦ករណី។ នេះបើយោងតាមលិខិតរបស់ ក្រសួងមហាផ្ទៃ។
សម្ដេច ស ខេង បានសរសេរលើបណ្ដាញសង្គមហ្វេសប៊ុក នាថ្ងៃទី១៥ កក្កដា នេះថា «វឌ្ឍនភាពការងារនេះ អាចសម្រេចបានដោយសារកិច្ចខិតខំប្រឹងប្រែង និងកិច្ចសហការគ្នាល្អរវាងថ្នាក់ដឹកនាំ និងមន្ត្រីអង្គភាពចំណុះក្រសួងមហាផ្ទៃ ស្ថាប័នពាក់ព័ន្ធនៅថ្នាក់ជាតិ និងថ្នាក់ក្រោមជាតិ ជាមួយ ក្រុមការងារគេហទំព័រហ្វេសប៊ុករបស់ខ្ញុំ ទោះជាក្នុងស្ថានភាពប្រឈមមុខនឹងការរីករាលដាលនៃជំងឺកូវីដ-១៩ក៏ដោយ»។
សម្ដេចបានថ្លែងអំណរគុណជនរួមជាតិដែលបានលើកជាមតិយោបល់ និងសំណូមពរនានាមកកាន់ សម្ដេច តាមរយៈទំព័រហ្វេសប៊ុក ដើម្បីរួមគ្នាដោះស្រាយនូវបញ្ហា និងរួមគ្នាអភិវឌ្ឍន៍សង្គមជាតិឲ្យកាន់តែរីកចំរើន។
ជាងនេះទៅទៀត សម្ដេច ស ខេង ក៏បានសុំការយល់យោគអធ្យាស្រ័យចំពោះជនរួមជាតិ ចំពោះករណីមួយចំនួនទៀតដែលក្រុមការងារ និងភាគីពាក់ព័ន្ធនៅមិនទាន់បានដោះស្រាយចប់សព្វគ្រប់ អាស្រ័យលើករណីខ្លះទាមទារពេលវេលា និងអនុវត្តទៅតាមនីតិវិធី៕
![](https://dap-news.com/wp-content/uploads/2020/08/1-1.png)