ភ្នំពេញ៖ ធនាគារជាតិនៃកម្ពុជា បានឲ្យដឹងថា គិតត្រឹមចុងឆមាសទី១ ឆ្នាំ២០២១ ប្រព័ន្ធធនាគារមានទ្រព្យ សកម្មសរុប ២២១,៨ ទ្រីលានរៀល កើនឡើង១៧,៦% បើធៀបនឹងរយៈពេលដូចគ្នា ឆ្នាំ២០២០ ស្របពេលប្រាក់បញ្ញើ បានកើនឡើង១៩,៧% ចំនួន ១៣០,៨ ទ្រីលានរៀល។
យោងតាមគេហទំព័រហ្វេសប៊ុករបស់ ធនគារជាតិនៃកម្ពុជា នាថ្ងៃទី១៥ ខែកញ្ញា ឆ្នាំ២០២១នេះ បានបញ្ជាក់ថា «ទន្ទឹមនេះ ប្រព័ន្ធធនាគារបានដើរតួយ៉ាងសំខាន់ ក្នុងការទ្រទ្រង់សកម្មភាពសេដ្ឋកិច្ច តាមរយៈការផ្តល់ឥណទាន គាំទ្រដល់ការវិនិយោគ និងចំណាយចាំបាច់ផ្សេងទៀត ផងដែរ»។
ធនគារជាតិនៃកម្ពុជា ក៏បានអះអាងថា ទោះបីស្ថិតក្នុងបរិបទនៃជំងឺកូវីដ-១៩ក្តី ក៏ស្ថានភាពវិស័យធនាគារ នៅតែទទួលបានកំណើនទ្រព្យសកម្ម ប្រាក់បញ្ញើ និងឥណទាន ស្របពេលដែលឥណទាន មិនដំណើរការនៅមានកម្រិតទាប ប្រមាណ ២,៥%៕
