ភ្នំពេញ៖ លោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍ (MISTI) និងលោក Pablo Kang ឯកអគ្គរាជទូតអូស្ត្រាលីប្រចាំនៅកម្ពុជា បានសម្ពោធដាក់ឲ្យដំណើរការ បច្ចេកវិទ្យាចម្រោះទឹកស្អាតថ្មីមួយ នៅរោងចក្រផលិត ទឹកស្អាតខេត្តបាត់ដំបង និងផ្សព្វផ្សាយពីលទ្ធផល នៃការសិក្សាស្រាវជ្រាវ «ផែនការវិនិយោគថ្នាក់ខេត្ត សម្រាប់ការផ្គត់ផ្គង់ទឹកស្អាតនៅកម្ពុជា»។ នេះយោងតាមសេចក្ដីប្រកាសព័ត៌មាន របស់ស្ថានទូតអូស្ដ្រាលី ថ្មីៗនេះ។
![](https://dap-news.com/wp-content/uploads/2021/12/photo_2021-12-03_13-46-29-1024x768.jpg)
នាឱកាសនោះ លោកទេសរដ្ឋមន្រ្តី ចម ប្រសិទ្ធ បានឲ្យដឹងថា ពិធីដាក់ដំណើរការនេះ បង្ហាញពីបច្ចេកវិទ្យាកំពុង ត្រូវបានយកចិត្តទុកដាក់ប្រើប្រាស់ សម្រាប់ប្រព័ន្ធផ្គត់ផ្គង់ទឹកស្អាតនៅកម្ពុជា។ កិច្ចសហប្រតិបត្តិការ រវាងក្រសួងឧស្សាហកម្ម ជាមួយកម្មវិធីវិនិយោគ ក្នុងវិស័យហេដ្ឋារចនាសម្ព័ន្ធ (3i) ដែលបានគាំទ្រដល់ការសិក្សាផែនការ វិនិយោគតាមបណ្តាខេត្ត (PIP) គឺជាត្រីវិស័យដ៏មានសារៈសំខាន់ សម្រាប់ការអភិវឌ្ឍន៍វិស័យទឹកស្អាត។
![](https://dap-news.com/wp-content/uploads/2021/12/photo_2021-12-03_13-46-23.jpg)
ដោយឡែក លោក Pablo Kang មានមោទកភាពដែល ឃើញក្រុមហ៊ុនអូស្ត្រាលី នាំយកបច្ចេកវិទ្យាផលិតទឹកស្អាត ប្រកបដោយសុវត្ថិភាព និងល្អសម្រាប់បរិស្ថានមកកាន់កម្ពុជា។ លោកសង្ឃឹមថា ការសិក្សាស្រាវជ្រាវ PIP នេះ ក៏នឹងផ្តល់ផែនទីបង្ហាញផ្លូវ និងឧបករណ៍គោលនយោបាយ ដ៏មានប្រយោជន៍ សម្រាប់រដ្ឋាភិបាលកម្ពុជា ដើម្បីសម្រេចបាននូវគោលដៅរបស់ខ្លួន ក្នុងការផ្តល់ទឹកស្អាតដល់ ប្រជាជនកម្ពុជាទាំងអស់គ្នា នៅត្រឹមឆ្នាំ ២០៣០។
![](https://dap-news.com/wp-content/uploads/2021/12/photo_2021-12-03_13-46-31-1024x766.jpg)
សូមជម្រាបថា ឯកអគ្គរាជទូត Kang កាលពីខែកញ្ញាកន្លងទៅ បានទៅទស្សនារោងចក្រ នៅខេត្តបាត់ដំបង និងបានសម្រេច ដាក់បច្ចេកវិទ្យាសម្អាតទឹករបស់អូស្ត្រាលី ក្នុងការផ្គត់ផ្គង់ទឹកស្អាត សម្រាប់ប្រជាពលរដ្ឋកម្ពុជា។ ប្រព័ន្ធសម្អាតទឹកនេះ ប្រើប្រាស់បច្ចេកវិទ្យា យូអេហ្វ (UF) និងអាងស្តុកទឹកដើម្បីចែកចាយ ទឹកស្អាតនិងសុវត្ថិភាព ចំណុះ ១២០,០០០លីត្រក្នុងមួយថ្ងៃ ដល់ប្រជាពលរដ្ឋប្រមាណ ៥ ០០០នាក់ នៅក្នុងភូមិចំនួន១២ ក្នុងឃុំព្រែកជីក ខេត្តបាត់ដំបង។
លើសពីនេះទៀត កម្មវិធីវិនិយោគក្នុង វិស័យហេដ្ឋារចនាសម្ព័ន្ធ របស់អូស្រ្តាលីដែលមាន ទឹកប្រាក់វិនិយោគសរុប ៤៩,៤ លានដុល្លារអូស្ត្រាលី បានសហការជាមួយសមាគមទឹកអូស្ត្រាលី (AWA) និងសមាគមផ្គត់ផ្គង់ទឹកកម្ពុជា (CWA) ដើម្បីនាំយកបច្ចេកវិទ្យាចម្រោះទឹកស្អាតនេះ មកកម្ពុជា ៕
![](https://dap-news.com/wp-content/uploads/2020/08/1-1.png)