ភ្នំពេញ៖ លោកឧត្តមសេនីយ៍ឯក ម៉ៅ សុផាន់ មេបញ្ជាការរងកងទ័ពជេីងគោក មេបញ្ជាការកងពលតូចលេខ៧០ បានទទួលស្វាគមន៍ លោកវរសេនីយ៍ឯក Nguyen Thanh Chinh នាយការិយាល័យអនុព័ន្ធយោធាវៀតណាម ដែលត្រូវបញ្ចប់អាណត្តិ ចូលជួបសម្តែងការគួរសម ជម្រាបលា និងជូនពរក្នុងឱកាសចូលឆ្នាំប្រពៃណីខ្មែរ នាពេលខាងមុខនេះ និងលោកវរសេនីយ៍ឯកបម្រុង Tran Van Tam នាយការិយាល័យ អនុព័ន្ធយោធាវៀតណាមថ្មីបង្ហាញមុខ នៅទីបញ្ជាការកងពលតូចលេខ៧០ ព្រឹកថ្ងៃទី៣១ ខែមីនា ឆ្នាំ២០២២។
លោកមេបញ្ជាការកងពល បានសម្តែងការកោតសរសើរ ចំពោះកិច្ចខិតខំប្រឹងប្រែង របស់លោកវរសេនីយ៍ឯក Nguyen Thanh Chinh បានរួមចំណែកក្នុងការលើកកម្ពស់ ពង្រឹងទំនាក់ទំនងជាអ្នកជិតខាងល្អ មិត្តភាពជាប្រពៃណី និងកិច្ចសហប្រតិបត្តិការគ្រប់ជ្រុងជ្រោង រវាងកងទ័ពប្រទេសទាំងពីរ។
ក្នុងនោះដែរ លោកឧត្តមសេនីយ៍ឯក ក៏បានបញ្ជាក់ថានឹងបន្តជួយគាំទ្រ និងសហការឱ្យជិតស្និទ្ធថែមទៀត ជាមួយលោកវរសេនីយ៍ឯកបម្រុង Tran Van Tam ដើម្បីសម្រេចបេសកកម្មរបស់ខ្លួននៅកម្ពុជា៕
