ព័ត៌មានជាតិ

ឆេះម៉ូតូស៊េរីទំនើប៤១គ្រឿង នៅរោងចក្រ ស៊ីកូ ក្នុងតំបន់សេដ្ឋកិច្ចពិសេស មែនហាធេន ក្រុងបាវិត

ស្វាយរៀង៖ ម៉ូតូស៊េរីទំនើបឆ្នាំ២០២២ ជាច្រើនគ្រឿង ត្រូវបានភ្លើងឆេះសល់ តែគ្រោងឆ្អឹងក្នុងរោងចក្រ «ស៊ីកូ» ដោយសាទុស្សេខ្សែភ្លើង ស្ថិតនៅតំបន់សេដ្ឋកិច្ចពិសេសមែនហាធេន ក្រុងបាវិត ខេត្តស្វាយរៀង។

បើយោងតាមសេចក្តីរាយការណ៍ ពីកម្មករកម្មការិនី បានប្រាប់ ឱ្យដឹងថា មានករណីអគ្គីភ័យមួយ បានលេបត្របាក់ម៉ូតូអស់ប្រមាណ ៤១គ្រឿង នៅក្នុងរោងចក្រស៊ីកូ ស្ថិតនៅតំបន់សេដ្ឋពិសេសមេហាធេន ក្រុងបាវិតកាលពីវេលាម៉ោង ១៖៤០ នាទីរសៀលថ្ងៃទី២៤ ខែឧសភា ឆ្នាំ២០២២នេះ។

ប្រភពពីកម្មករ កម្មការិនីដដែល បានបញ្ជាក់ថា នៅមុនពេលកើតហេតុកម្មកររោងចក្រ បានចូលធ្វើការជាធម្មតាស្រាប់តែមានអណ្ដាតភ្លើង និងផ្សែងហុយចេញពីកន្លែងដាក់ម៉ូតូ ក៏មានការភ្ញាក់ផ្អើលតែម្ដង ខណៈនោះក៏មានសន្តិសុខ បានចុះយកបំពង់ពន្លត់អគ្គីភ័យបាញ់ទៅលើម៉ូតូដែរ តែមិនអាចគ្រប់គ្រងស្ថានការណ៍បានទើបធ្វើឱ្យម៉ូតូជាច្រើនគ្រឿងឆេះសល់តែគ្រោងឆ្អឹង។

រហូតដល់ម៉ោង៣៖៣០នាទី រសៀលថ្ងៃដដែលនេះ ភ្លើងបានរលត់ទាំងស្រុង ហើយសមត្ថកិច្ចបានបញ្ជាក់ថាមូលហេតុដែលនាំឱ្យមានការឆេះនេះគឺបណ្ដាលមកពីទុស្សេខ្សែភ្លើង។

To Top