បរទេស៖ មូលនិធីរូបិយវត្ថុអន្តរជាតិ IMF កាលពីថ្ងៃពុធម្សិលមិញនេះ បានធ្វើការបង្ហោះរបាយការណ៍មួយ នៅលើវេបសាយរបស់ខ្លួនដោយ បានលើកឡើងពីបញ្ហា នៃការកាត់ផ្តាច់ហ្គាសទាំងស្រុងពីរុស្សីថា នឹងអាចកាត់បន្ថយ GDP នៃបណ្តារដ្ឋសមាជិក ក្នុងប្លុកអឺរ៉ុបដល់៦ភាគរយ រៀងគ្នាហើយនឹងធ្វើឲ្យប្លុកទាំងមូល ជួបវិបត្តិសេដ្ឋកិច្ចជាមិនខាន។
ការព្រមានធ្ងន់ៗនេះត្រូវបានធ្វើឡើង នៅក្នុងពេលដែលមានការព្រួយបារម្ភថា ការផ្គត់ផ្គង់ហ្គាសរបស់រុស្សីទៅកាន់ ប្លុកអឺរ៉ុបតាមរយៈបំពង់បង្ហូរប្រេង Nort Stream 1 នឹងមិនអាចត្រឡប់មក ដំណើរការឡើងវិញឡើយ ទោះបីជាបានបញ្ជាក់ពីខាងរុស្សី ហើយថាដំណើរការជួសជុលនិងថែរក្សាប្រចាំឆ្នាំ នឹងបញ្ចប់ទៅក្នុងសប្តាហ៍ក្តី។
កាលពីដើមសប្តាហ៍កន្លងមកនេះបុគ្គលល្បីៗ ក្នុងប្លុកអឺរ៉ុបរួមទាំងប្រធានគណកម្មការ ថវិការបស់អឺរ៉ុបលោក Johannes Hahn ក៏បានអះអាងដែរថា នឹងមិនរំពឹងទុកថាបំពង់បង្ហូរប្រេងនេះ នឹងដំណើរការឡើងវិញនោះដែរ។
IMF ក៏បានអះអាងដែរថា បញ្ហាថាមពល និងកំណើនយឹតយ៉ាវនឹងកើតឡើង ហើយជាពិសេសប្រទេសដែល រងគ្រោះធ្ងន់ធ្ងរជាងគេមាន ដូចជាប្រទេសហុងគ្រី ប្រទេសស្លូវ៉ាគីនិងប្រទេសឆេក៕
ប្រែសម្រួល៖ ស៊ុន លី
