ភ្នំពេញ៖ ថ្មីៗនេះ បន្ទាប់ពីរកឃើញថា មានគណនី បណ្តាញសង្គមមួយចំនួន បានប្រើប្រាស់ឈ្មោះ និងរូបភាព ក៏ដូចជាការបង្ហោះរាល់សកម្មភាព របស់លោកស្រីបណ្ឌិត ពេជ ចន្ទមុន្នី ភរិយាសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានធ្វើឲ្យសាធារណៈជនមួយចំនួន មានការភាន់ច្រឡំ ។
ដើម្បីកុំឲ្យមានការភាន់ច្រឡំនោះ លោក គួច វែងស្រ៊ុន រដ្ឋលេខាធិការ នៃទីស្តីការគណៈរដ្ឋមន្ត្រី និងជាក្រុមការងារព័ត៌មាន របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាថ្ងៃទី៩ ខែកញ្ញា ឆ្នាំ២០២៣នេះ បានធ្វើការបញ្ជាក់ថា “សូមគោរពជម្រាបសាធារណ:ជនមេត្តាជ្រាបថា លោកជំទាវបណ្ឌិត ពេជ ចន្ទមុន្នី ស្ត្រីទីមួយកម្ពុជា គឺប្រើប្រាស់បណ្តាញសង្គមតែមួយប៉ុណ្ណោះ ដែលមានឈ្មោះថា Chanmony Pich ដោយមាន Link: https://www.facebook.com/chanmony.pich.9 ។
លោកបានបញ្ជាក់បន្ថែមថា “លោកជំទាវបណ្ឌិត ពុំមានបង្កើតគណនី ឬប្រើប្រាស់បណ្តាញសង្គមផ្សេងទៀតនោះទេ ដូចនេះសូមបងប្អូនមេត្តាជ្រាប និងកុំមានការភាន់ច្រលំណាមួយ។ ជាមួយនេះ សូមបងប្អូនដែលបានបង្កើត គណនីបណ្តាញសង្គមផ្សេង សូមបញ្ឈប់ក្នុងការប្រើប្រាស់ឈ្មោះ និងរូបភាពរបស់លោកជំទាវបណ្ឌិត”៕
