ព័ត៌មានជាតិ

មនុស្សជាង ១២ម៉ឺននាក់ បានចុះសមាជិករបបសន្តិសុខ ផ្នែកថែទាំសុខភាពតាមរបបភាគទាន ដោយស្ម័គ្រចិត្ត

ភ្នំពេញ៖ គិតត្រឹមថ្ងៃទី២៣ ខែមករា ២០២៤​ ក្រសួងការងារ និងបណ្តុះបណ្តាលវិជ្ជាជីវៈ បានចុះសមាជិករបបសន្តិសុខ ផ្នែកថែទាំសុខភាពតាមរបបភាគទាន ដោយស្ម័គ្រចិត្តសរុបចំនួន ១២៦ ៤៧៥នាក់។ នេះបើតាមលោក​ ហេង សុផាន់ណារិទ្ធ អគ្គនាយករងបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ។

បើតាមលោក​ ហេង​ សុផាន់ណារិទ្ធ​ ក្នុងចំណោមសមាជិក របបសន្តិសុខផ្នែកថែ ទាំសុខភាពតាមរបបភាគទាន ដោយស្ម័គ្រចិត្តសរុបចំនួន ១២៦ ៤៧៥នាក់ ក្នុងនោះ បុគ្គលស្វ័យនិយោជន៍ចំនួន ១១០ ១៧៣នាក់ និងអ្នកក្នុងបន្ទុកសមាជិក ប.ស.ស. មានចំនួន ១៦ ៣០២នាក់។

លោក​ បន្ថែមថា រហូតមកទល់ពេលនេះសមាជិក ប.ស.ស. ផ្នែកថែទាំសុខភាព តាមរបបភាគទាន ដោយស្ម័គ្រចិត្តបានទៅ ប្រើប្រាស់សេវាមានចំនួន ៦៧ ២៤៨ដង។ដោយឡែក ការចំណាយតាវកាលិកទូទាត់ មូលដ្ឋានសុខាភិបាល មានចំនួន ៩៧០,៨២លានរៀល។

លោក​លើកឡើងថា ចាប់តាំងពីសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៅថ្ងៃទី១៤ខែ វិច្ឆិកា​ ឆ្នាំ២០២៣ បាន ប្រកាសដាក់ឱ្យអនុវត្តន៍ជាផ្លូវការ របបសន្តិសុខសង្គមផ្នែកថែទាំសុខភាព តាមរបបភាគទានដោយស្ម័គ្រចិត្ត ក្រសួងការងារ បានការផ្សព្វផ្សាយតាមបណ្តាញសង្គម និងបានចុះយុទ្ធនាការតាមរោងចក្រ សហគ្រាស ផ្ទះជួល ផ្សារ និងទីប្រជុំជនយ៉ាងសកម្មផងដែរ ។

គិតត្រឹមថ្ងៃនេះ បានចុះយុទ្ធនាការតាមរោងចក្រ សហគ្រាស ផ្ទះជួល ផ្សារ និងទីប្រជុំជនសរុបចំនួន ៤ ៦៤៦លើក ដែលមានអ្នកចូលរួមចំនួន ១ ៣៧៦ ៥០៥នាក់ និងការផ្សព្វផ្សាយតាមបណ្តាញសង្គមផ្លូវការ Facebook, Telegram, YouTube, TikTok និងតាមបណ្តាញ សង្គមរបស់សិល្បករ តារាចម្រៀង និងអ្នកមាន ប្រជាប្រិយភាព ក្នុងបណ្ដាញសង្គម ដោយមានចំនួនចែករំលែកបន្ត ៦ ៨៨៤ដង និងចំនួនចូលទស្សនា ២១១ ២៩០ដងបន្ថែមទៀត ៕

To Top