ភ្នំពេញ ៖ តបតាមការអញ្ជើញរបស់លោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា លោកស្រី Dominique Hasler រដ្ឋមន្ត្រីការបរទេស អប់រំ និងកីឡា នៃបុរីក្សត្រលិចតិនស្តាញ នឹងអញ្ជើញមកបំពេញទស្សនកិច្ចផ្លូវការ នៅព្រះរាជាណាចក្រកម្ពុជា ពីថ្ងៃទី២៩ ខែកុម្ភៈ ដល់ថ្ងៃទី២ ខែមីនា ឆ្នាំ២០២៤ ។
យោងតាមសេចក្ដីប្រកាសព័ត៌មាន របស់ក្រសួងការបរទេសខ្មែរ នាថ្ងៃទី២៨ កុម្ភៈនេះ បានឲ្យដឹងថា ក្នុងដំណើរទស្សនកិច្ចនេះ លោកស្រី Dominique Hasler នឹងជួបជាមួយ ឧបនាយករដ្ឋមន្ត្រី សុខ ចិន្ដាសោភា ដើម្បីពិភាក្សាលើវិស័យនានានៃកិច្ចសហប្រតិបត្តិការ ក៏ដូចជាបញ្ហាតំបន់ និងអន្តរជាតិ ដែលជាចំណាប់អារម្មណ៍ និង កង្វល់រួម ។ រដ្ឋមន្ត្រីការបរទេសទាំងពីរ នឹងចុះហត្ថលេខាលើកិច្ចព្រមព្រៀង ក្របខ័ណ្ឌរវាងរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាល នៃបុរីក្សត្រលិចតិនស្តាញ ស្តីពីកិច្ចសហ ប្រតិបត្តិការអភិវឌ្ឍន៍។
ជាមួយគ្នានេះ ដើម្បីជំរុញ កិច្ចសហប្រតិបត្តិការ លើវិស័យអប់រំ និងបណ្តុះបណ្តាលវិជ្ជាជីវៈលោកស្រី Dominique Hasler នឹងជួបពិភាក្សាការងារ ដាច់ដោយឡែកជាមួយ បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងលោក ហេង សួរ រដ្ឋមន្ត្រី ក្រសួងការងារ និងបណ្តុះបណ្តាលវិជ្ជាជីវៈ ។ លោកស្រី ក៏នឹងអញ្ជើញចុះពិនិត្យគម្រោងនានាដែល គាំទ្រដោយការិយាល័យ អភិវឌ្ឍន៍លិចតិនស្តាញនៅកម្ពុជា ផងដែរ។
ដំណើរទស្សនកិច្ចផ្លូវការរបស់ លោកស្រី Dominique Hasler នៅកម្ពុជា គឺជាព្រឹត្តិការណ៍ដ៏ សំខាន់នៅក្នុងទំនាក់ទំនងមិត្តភាពរវាងប្រទេសទាំងពីរ សំដៅជំរុញកិច្ចសហប្រតិបត្តិការ ដើម្បីជាផល ប្រយោជន៍សម្រាប់ប្រជាជននៃប្រទេសទាំងពីរ ៕
