ភ្នំពេញ ៖ កម្ពុជា និងរដ្ឋលិចតិនស្តាញ (Liechtenstein) ក្នុងតំបន់អឺរ៉ុប បានឯកភាពគ្នា ក្នុងការបន្តកិច្ចសហប្រតិបត្តិការ លើការបណ្តុះបណ្តាល ជំនាញ បច្ចេកទេសវិជ្ជាជីវៈនៅកម្ពុជា ដែលមានស្រាប់ និងពិនិត្យលទ្ធភាពពង្រីក កិច្ចសហប្រតិបត្តិការថ្មីដើម្បីជំរុញ ឱ្យកម្លាំងពលកម្មកម្ពុជាមានផលិតភាព ការងារខ្ពស់ និងទាក់ទាញវិនិយោគបន្ថែម ។
ការបញ្ជាក់យ៉ាងដូចនេះ គឺធ្វើឡើងក្នុងជំនួបសំដែង ការគួរសមរវាងលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោកស្រី ឌូមីនិក ហាស្លឺ (Dominique Hasler) រដ្ឋមន្ត្រីក្រសួងការបរទេស អប់រំ និងកីឡា នៃប្រទេសលិចតិនស្តាញដែលធ្វើឡើងនៅថ្ងៃសុក្រ ទី១ ខែមិនា ឆ្នាំ២០២៤នេះ នៅទីស្តីការក្រសួង ។
![](https://dap-news.com/wp-content/uploads/2024/03/IMG_8600-1-1024x683.jpg)
ក្នុងជំនួបប្រកបដោយភាព ស្និទ្ធស្នាល លោករដ្ឋមន្ត្រី បានថ្លែងអំណរគុណ ចំពោះរដ្ឋាភិបាលលិចតិនស្តាញ (Liechtenstein) ដែលបានជួយពង្រឹងបន្ថែម នូវគុណវុឌ្ឍិនៃការបណ្តុះបណ្តាល ជំនាញបច្ចេកទេស និងវិជ្ជាជីវៈរបស់កម្ពុជា ស្របទៅនឹងគោលនយោបាយថ្នាក់ជាតិ ដើម្បីឱ្យពលរដ្ឋកម្ពុជាមានជំនាញ ជាក់លាក់ និងអាចបង្កើន ផលិតភាពការងារ និង មានប្រៀបប្រកួតប្រជែង ក្នុងការទាក់ទាញវិនិយោគិន ដែលកំពុងសម្លឹង រកការវិនិយោគមកកាន់តំបន់អាស៊ាន ។
![](https://dap-news.com/wp-content/uploads/2024/03/IMG_8668-1-1024x683.jpg)
មួយវិញទៀត លោករដ្ឋមន្ត្រី បានគូសបញ្ជាក់ថា តម្រូវការ ដែលកម្ពុជាចង់បានបន្ថែមនោះ គឺការពង្រឹងគុណវុឌ្ឍិ និងស្តង់ដានៃការបណ្តុះបណ្តាល ឱ្យមានបទដ្ឋានអន្តរជាតិ ដើម្បីបំពេញតម្រូវការទីផ្សារ ដែលកំពុងប្រកួតប្រជែង។
![](https://dap-news.com/wp-content/uploads/2024/03/IMG_8715-1-1024x683.jpg)
ទន្ទឹមនឹងនេះ លោកស្រីរដ្ឋមន្ត្រី បានសាទរ ចំពោះផែនការ នៃការបណ្តុះបណ្តាលជំនាញ របស់កម្ពុជាដោយគូសបញ្ជាក់ថា ជំនាញបច្ចេកទេសដើរតួនាទីសំខាន់ ក្នុងការរុញច្រានកំណើនសេដ្ឋកិច្ចសម្រាប់ប្រទេសជាតិ។
![](https://dap-news.com/wp-content/uploads/2024/03/IMG_8653-1-1024x683.jpg)
លើសពីនេះ ភាគីទាំងពីរ ក៏បានឯកភាពពិនិត្យមើលលទ្ធភាព ចំពោះកិច្ចសហប្រតិបត្តិការថ្មី ក្នុងការពង្រឹងការបណ្តុះបណ្តាល ជំនាញបច្ចេកទេស និងវិជ្ជាជីវៈ នៅកម្ពុជាឱ្យកាន់តែសម្បូរបែប និងបត់បែន សម្រាប់ពលរដ្ឋឱ្យស្របទៅ តាមតម្រូវការទីផ្សារ នាពេលបច្ចុប្បន្ន និង ការវិវឌ្ឍន៍ នៃបច្ចេកវិទ្យាឌីជីថលថ្មីៗ ដើម្បីឱ្យពលរដ្ឋកម្ពុជា មានលទ្ធភាព និងសមត្ថភាព ខ្ពស់ក្នុងសង្វាក់ ផលិតកម្មដែលជាឈ្នាន់ក្នុងការថែរក្សា វិនិយោគ ដែលមានស្រាប់ និងទាក់ទាញវិនិយោគថ្មីៗបន្ថែម ៕
![](https://dap-news.com/wp-content/uploads/2024/03/IMG_8662-1-1024x683.jpg)
![](https://dap-news.com/wp-content/uploads/2024/03/IMG_8703-1-1024x683.jpg)
![](https://dap-news.com/wp-content/uploads/2024/03/IMG_8729-1-1024x681.jpg)
![](https://dap-news.com/wp-content/uploads/2024/03/IMG_8743-1-1024x683.jpg)
![](https://dap-news.com/wp-content/uploads/2024/03/IMG_8719-1-683x1024.jpg)
![](https://dap-news.com/wp-content/uploads/2020/08/1-1.png)