ភ្នំពេញ៖ សម្តេចតេជោ ហ៊ុន សែន ប្រមុខរដ្ឋស្ដីទីកម្ពុជា បានថ្លែងថា ក្នុងបណ្ដាប្រទេសអាស៊ាន មិនព្រួយបារម្ភអំពីការខ្វះស្បៀងនោះទេ ដោយសារបណ្ដាសមាជិកអាស៊ានមួយចំនួន ជាប្រទេសផលិតស្រូវ។
![](https://dap-news.com/wp-content/uploads/2024/04/photo_2024-04-09_13-58-01-1024x682.jpg)
នាឱកាសអនុញ្ញាតឲ្យលោក តាន់ ស្រ៊ី មីឆែល យ៉េវ (Tan Sri Michael Yeoh) ប្រធានវិទ្យាស្ថានយុទ្ធសាស្ត្រ KSI ប្រចាំតំបន់អាស៊ីប៉ាស៊ីហ្វិក ចូលជួបសម្ដែងការគួរសម នាថ្ងៃទី៩ មេសា សម្ដេចតេជោ បានផ្ដល់យោបល់ឲ្យយកចិត្តទុកដាក់ ទៅលើទីផ្សារនៅក្នុងតំបន់ ត្រូវយកទុកដាក់លើអ្វីដែលមានហើយ ដូចជា កិច្ចព្រមព្រៀង RCEP, China-ASEAN Free Trade និងសមាជិកអាស៊ាននីមួយៗ ជាមួយបណ្ដាប្រទេសផ្សេងទៀត។
![](https://dap-news.com/wp-content/uploads/2024/04/photo_2024-04-09_13-58-03-1024x682.jpg)
សម្ដេចតេជោ បានរំលេចផងដែរថា «នៅក្នុងបណ្ដាប្រទេសអាស៊ានយើងនេះ យើងមិនព្រួយបារម្ភពីការខ្វះស្បៀងនោះទេ ដោយសារបណ្ដាសមាជិកអាស៊ាន មួយចំនួនជាប្រទេសផលិតស្រូវ ស្បៀង ហើយប្រទេសមួយចំនួនទៀត គឺជាប្រទេសដែលនាំចូលនូវស្បៀងអាហារ ដូច្នេះយើងអាចបំពេញឲ្យគ្នាទៅវិញទៅមក ហើយត្រូវធ្វើខិតខំធ្វើ សមាហរដ្ឋកម្មលើវិស័យពាណិជ្ជកម្ម ការវិនិយោគផ្សេងៗជាមួយគ្នា»។
![](https://dap-news.com/wp-content/uploads/2024/04/photo_2024-04-09_13-58-04-1024x682.jpg)
សម្ដេចតេជោ ក៏បានផ្ដល់អនុសាសន៍ឲ្យ វិទ្យាស្ថាន KSI និង AVI របស់កម្ពុជាធ្វើការសិក្សារួមគ្នា ជំរុញទំនាក់ទំនងរកទីផ្សារនៅក្នុង តំបន់ជាពិសេសរវាងអាស៊ាន និងចិន។
ជាការឆ្លើយតប លោក Tan Sri Michael Yeoh បានថ្លែងអំណរគុណចំពោះ សម្តេចតេជោបានផ្ដល់ជាអនុសាសន៍ លើការទំនាក់ទំនងរវាង អាស៊ាន និងចិន និងបានកោតសរសើរនូវរចនាបទ និងការសំបូរណ៍បែបនៃវប្បធម៌ អរិយធម៌ បេតិកភណ្ឌរបស់កម្ពុជា ដោយថែរក្សាបានយ៉ាងល្អ ៕
![](https://dap-news.com/wp-content/uploads/2024/04/photo_2024-04-09_13-58-05-1024x682.jpg)
![](https://dap-news.com/wp-content/uploads/2020/08/1-1.png)