ភ្នំពេញ៖ លោក ICHIRO KASHITANI ប្រធាននាយកប្រតិបត្តិក្រុមហ៊ុន តូយ៉ូតា ស៊ុយស៊ូ បានលើកឡើងថា បើពិភពលោកនេះ មានអ្នកដែលមានគំនិតដូច សម្តេចតេជោ ប្រទេសនានានឹងមានសុខសន្តិភាព ដូចកម្ពុជា។
ការលើកឡើងបែបនេះ ធ្វើឡើងក្នុងឱកាសប្រធាននាយកប្រតិបត្តិ រូបនេះ ចូលជួបសម្តែងការគួរសម និងពិភាក្សាការងារ ជាមួយសម្ដេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា កាលពីម្សិលមិញ។
ក្នុងជំនួបនេះ សម្ដេចតេជោ មានប្រសាសន៍ថា នេះជាលើកទី១ ហើយដែលសម្តេច បានទទួលគណៈប្រតិភូ ក្រុមហ៊ុនបរទេសទី១ នៅវិមាន ព្រឹទ្ធសភានេះ ។
សម្តេចបានលើកឡើងថាអគារនេះ ត្រូវបានសាងសង់ឡើងដោយ ព្រះករុណា សម្តេចព្រះនរោត្ដម សីហនុ នៅពេលដែលព្រះអង្គជាប្រមុខរដ្ឋ ហើយអគារនេះ នឹងត្រូវរក្សាទុកជាប្រវត្តិសាស្ត្រ ដែលពុំមានការរុះរើ ឬកែប្រែអ្វីទៅជា ទំនើបឡើយ។
សម្ដេចបានលើកឡើងថា សម្ដេចក៏បានតាមដានការផ្សាយបន្តផ្ទាល់ ការសម្ពោធក្រុមហ៊ុន Toyota កាលពីម្សិលមិញ សម្តេចបានចាត់ទុកថា វាគឺជាសមិទ្ធផលមួយ ដែលកម្ពុជា ទទួលបាន បន្ទាប់ពីមានការផ្លាស់ប្តូរថ្នាក់ដឹកនាំ ពីជំនាន់ចាស់ទៅថ្នាក់ជំនាន់ថ្មី ដែលបានប្រព្រឹត្តទៅត្រឹមត្រូវ ហើយមិនមានចលាចលឬការប្រែប្រួល ផ្ទុយទៅវិញគឺ មានដំណើរការអភិវឌ្ឍ ស្ថិរភាពនយោបាយ កំណើនសេដ្ឋកិច្ចនៅដំណើរការល្អប្រសើរ ហើយការបើកសម្ពោធរោងចក្រ តូយ៉ូតា នេះ ជាភស្តុតាងស្រាប់។
លោក ICHIRO បានសម្ដែងការគោរព និងអរគុណចំពោះសម្តេចតេជោ ប្រធានព្រឹទ្ធសភាដែលបានទទួលគណៈប្រតិភូ របស់លោក ហើយលោកបានសម្តែងការរីករាយណាស់ និងរំភើបដែលសម្តេចមានប្រសាសន៍ប្រាប់ថា គណៈប្រតិភូរបស់ លោកគឺជាភ្ញៀវក្រុមហ៊ុនបរទេសទី១ ដែលបានចូលជួបសម្តែងការគួរសមនៅទីនេះ ហើយលោក បានបញ្ជាក់ថានេះគឺជា កិត្តិយសខ្លាំងណាស់ ដែល សម្តេចធិបតី នាយករដ្ឋមន្ត្រី បានអញ្ជើញជាអធិបតីភាព ដ៏ខ្ពង់ខ្ពស់ ក្នុងពិធីសម្ពោធបើក ឲ្យដំណើរ ការក្រុមហ៊ុនតូយ៉ូតា កាលពីម្សិលមិញនេះ។
លោក ក៏បានប្ដេជ្ញាថានឹងខិតខំប្រឹងប្រែងអនុវត្តតាមអនុសាសន៍ណែនាំរបស់ សម្តេចតេជោ ប្រធានព្រឹទ្ធសភា ក៏ដូចជា សម្ដេចធិបតីនាយករដ្ឋមន្ត្រីកាលពីម្សិលមិញ ហើយនឹងខិតខំដំណើរការរោងចក្រនេះ ឲ្យប្រកបដោយជោគជ័យ ជាមួយគ្នា ដែរលោកក៏បានជម្រាបជូនសម្តេចពីប្រវត្តិ របស់ក្រុមហ៊ុន Toyota ដែលបានចូលមកកម្ពុជាតាំងពីឆ្នាំ១៩៩១ ដោយមានជា
ដំណាក់កាល៖
-១៩៩៣ បានបង្កើតឈ្មោះ T.TH.K ទទួលសិទ្ធជាកន្លែងផ្តល់សេវាកម្មតូយ៉ូតា បង្កើត ការិយាល័យ តូយ៉ូតា ស៊ុយស៊ូ នៅក្រុងភ្នំពេញ
-២០០៩ បង្កើត តូយ៉ូតា (ខេមបូឌា) ឯ.ក ទទួលសិទ្ធជាអ្នកចែកចាយរថយន្តតូយ៉ូតា
-២០១៤ បង្កើត តូយ៉ូតា ស៊ុយស៊ូ ហ្វានែន (ខេមបូឌា) ឯ.ក
-២០១៦ បង្កើត សួនឧស្សាហ៍កម្មប៉ោយប៉ែត ជាផ្នែកមួយនៃវិស័យឧស្សាហ៍កម្ម
-២០២២បង្កើត រោងចក្រដំឡើងរថយន្ត តូយ៉ូតា ស៊ុយស៊ូ មេនូហ្វេកឆឺរីង (ខេមបូឌា) ឯ.ក
ហើយ ឆ្នាំនេះជាឆ្នាំខួបទី ៣១ របស់ក្រុមហ៊ុន ក្នុងការចាប់ផ្តើមអាជីវកម្មក្នុងប្រទេសកម្ពុជា ហើយ លោកបានសង្កេតឃើញ ថាកម្ពុជា បានសប្បាយរីករាយក្នុងឱកាសបុណ្យចូលឆ្នាំថ្មីប្រពៃណីជាតិខ្មែរក្រោមដំបូលសន្តិភាព។
លោក ICHIRO បានថ្លែងអំណរគុណ ចំពោះពាក្យពេជន៍ ដ៏មានអត្ថន័យរបស់ សម្តេចតេជោ និងបានមានប្រសាសន៍ថា បើ ពិភពលោកនេះ មានអ្នកដែលមានគំនិតដូច សម្តេចតេជោ ប្រទេសនានានឹងមានសុខសន្តិភាព ដូចកម្ពុជា ។
លោកបាន ប្តេជ្ញា នឹងចូលរួមយ៉ាងសកម្ម អនុវត្តតាមអនុសាសន៍របស់ប្រមុខដឹកនាំកម្ពុជា ចូលរួមជាមួយរាជរដ្ឋាភិបាល បង្កើនការផលិតនិងផ្តល់ការហ្វឹកហ្វឺនជំនាញរថយន្តដល់ប្រជាជនកម្ពុជា៕
