ភ្នំពេញ៖ ក្រុមហ៊ុនដឹកជញ្ជូនទំនិញតាមផ្លូវសមុទ្រ ជារឿយៗគេហៅថា “កប៉ាល់ដឹកទំនិញ”។ ក្រុមហ៊ុនទាំងនោះផ្តល់សេវាកម្មតាមកាលវិភាគជាក់លាក់ជាមួយនឹងកំពង់ផែ ដោយផ្តល់នូវមធ្យោបាយដែលអាចទុកចិត្តបានដើម្បីដឹកជញ្ជូនទំនិញពីប្រទេសទៅកាន់ប្រទេសមួយផ្សេងទៀត។ ឧទាហរណ៍ថា ការដឹកជញ្ជូនទំនិញពីកំពង់ផែកំពង់សោម ប្រទេសកម្ពុជា ទៅកាន់កំពង់ផែសៀវមិន ប្រទេសចិន។
តើក្រុមហ៊ុនកប៉ាល់នៅប្រទេសកម្ពុជាមានចំនួនប៉ុន្មាន?
យោងតាមរបាយការណ៍បានបង្ហាញថា បច្ចុប្បន្នក្រុមហ៊ុនកប៉ាល់ដែលជាភ្នាក់ងារ និងសាខារបស់ក្រុមហ៊ុនមេនិងតំបន់ នៅប្រទេសកម្ពុជាមានចំនួនប្រហែលជាង ១០ក្រុមហ៊ុន ដែលកំពុងសហការរកស៊ីជាមួយនឹងកំពង់ផែស្វយ័តក្រុងព្រះសីហនុ និងប្រហែលជាង ១០ក្រុមហ៊ុនទៀត ដែលកំពុងសហការជាមួយនឹងកំពង់ផែស្វយ័តភ្នំពេញ។ ប្រទេសកម្ពុជាបាននាំចេញផលិតផលជាច្រើនមាន អាហារ កសិកម្ម រថយន្ត គ្រឿងអេឡិចត្រូនិក វាយនភណ្ឌ សម្លៀកបំពាក់ កង់និងគ្រឿងបន្លាស់ គ្រឿងសង្ហារិម កាបូប ប្រដាប់ប្រដាក្មេងលេង សំបកកង់រ៉ាឌីកាល់ កម្រាលឈើ ជាដើម។
ហេតុអ្វីបានជារាជរដ្ឋាភិបាលកម្ពុជាត្រូវការកំពង់ផែសមុទ្រទឹកជ្រៅ និងព្រែកជីកហ្វូណន?
ការបង្កើតព្រែកជីកហ្វូណន និងកំពង់ផែសមុទ្រទឹកជ្រៅនឹងចូលរួមយ៉ាងសំខាន់ដើម្បីបង្កើនការដឹកជញ្ជូនទំនិញទៅកាន់ទីផ្សារពិភពលោកឱ្យបានទូលំទូលាយ និងជាសក្ដានុពលសំខាន់ដើម្បីកំណើនសេដ្ឋកិច្ចជាតិនាពេលអនាគត។ ជាការពិតណាស់ បច្ចុប្បន្នកប៉ាល់តូចៗដឹកទំនិញបានចំនួនតិច ហើយការដឹកជញ្ជូនត្រូវឆ្លងកាត់ប្រទេសសិង្ហបុរី ប្រសិនបើកប៉ាល់នោះចេញដំណើរពីកំពង់ផែស្វយ័តក្រុងព្រះសីហនុ និងត្រូវឆ្លងកាត់ប្រទេសវៀតណាម ប្រសិនបើកប៉ាល់ចេញដំណើរពីកំពង់ផែស្វយ័តភ្នំពេញ៕
ដោយ៖ យន់ ភិរុណ
