ភ្នំពេញ ៖ លោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានឲ្យដឹងថា កម្ពុជា ត្រូវការការចូលរួមពីអ្នកពាក់ព័ន្ធ ក្នុងការថែទាំសុខភាពសមុទ្រ ប្រកបដោយនិរន្តរភាព។
![](https://dap-news.com/wp-content/uploads/2024/07/photo_2024-07-24_09-24-37-1024x682.jpg)
ក្នុងពិធីបើកវេទិកាពិភាក្សាសមុទ្រខៀវ (Blue Sky) រៀបចំឡើងដោយ ស្ថានទូតបារាំង ប្រចាំកម្ពុជា នៅខេត្តព្រះសីហនុ នាថ្ងៃទី២៣ ខែកក្កដា ឆ្នាំ២០២៤ លោករដ្ឋមន្រ្តី អ៊ាង សុផល្លែត បានថ្លែងថា «កម្ពុជា នឹងចូលរួមយ៉ាងសកម្មក្នុងការធានា ការទាញយកធនធានធម្មជាតិសមុទ្រ ប្រកបដោយនិរន្តរភាព។ យើងកំពុងប្រឈមមុខនឹងការប្រែប្រួលអាកាសធាតុ ហើយយើងមិនចង់ឃើញសមុទ្ររបស់យើងទទួលរងពីវាទេ»។
![](https://dap-news.com/wp-content/uploads/2024/07/photo_2024-07-24_09-24-41-1024x682.jpg)
ក្នុងឱកាសនេះ លោករដ្ឋមន្រ្តី បានបានសង្កត់ធ្ងន់លើសារៈសំខាន់នៃការការពារបរិស្ថាន និងជីវចម្រុះសមុទ្រ ដោយបានស្វាគមន៍ កិច្ចសហប្រតិបត្តិការយ៉ាងជិតស្និទ្ធពីដៃគូពាក់ព័ន្ធ ដើម្បីចែករំលែកចំណេះដឹង និងកិច្ចសហប្រតិបត្តិការ ក្នុងការថែទាំសុខភាពសមុទ្រ ។ វាច្បាស់ណាស់ថា ការបំពុលដោយ សំណល់សំរាម ប្លាស្ទិក កើតឡើងដោយការមិនទាន់ បានទុកដាក់សំរាមបានល្អ ដែលបណ្តាលឱ្យមានការកើនឡើង និងផលប៉ះពាល់អវិជ្ជមាន លើសុខភាពមនុស្ស សង្គម សេដ្ឋកិច្ច បរិស្ថាន រួមទាំងការបំពុលសមុទ្រ និងសត្វព្រៃ។
![](https://dap-news.com/wp-content/uploads/2024/07/photo_2024-07-24_09-24-45-1024x682.jpg)
លោករដ្ឋមន្រ្តី បានលើកឡើងបន្ថែមថា ដើម្បីអភិរក្ស និងប្រើប្រាស់ប្រកបដោយនិរន្តរភាពនៃមហាសមុទ្រ និងធនធានសមុទ្រសម្រាប់ការអភិវឌ្ឍប្រកបដោយចីរភាព គឺជាតួនាទីរួមរបស់យើងរបស់ប្រទេសទាំងអស់។ លោករដ្ឋមន្រ្តី បានបញ្ជាក់ថា នៅក្នុងអាណត្តិទី៧ នៃរដ្ឋសភារាជរដ្ឋាភិបាល បានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ហើយតាមរយៈយុទ្ធសាស្ត្រនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើការណែនាំ និងចង្អុលបង្ហាញដល់ក្រសួងបរិស្ថាន ឲ្យរៀបចំឡើងនូវយុទ្ធសាស្ត្រចក្រាវិស័យបរិស្ថាន ដែលមានសរសរស្ដម្ភបី នោះគឺ ភាពស្អាត ភាពបៃតង និងចីរភាព។
![](https://dap-news.com/wp-content/uploads/2024/07/photo_2024-07-24_09-24-49-1024x682.jpg)
លោករដ្ឋមន្រ្តី បានសង្កត់ធ្ងន់ថា «ចំពោះភាពស្អាត កម្ពុជា ក្នុងរយៈពេល១១ ខែកន្លងមកនេះ យើងបានចាប់ផ្តើមយុទ្ធនាការ កាត់បន្ថយការប្រើប្រាស់ប្លាស្ទិក នោះមិនត្រឹមតែជាជំហានមួយ ហួសពីការពង្រីក ការប្តេជ្ញាចិត្ត និងថែមទាំងបានអនុវត្ត ការងារនានា ដើម្បីធានាថា កម្ពុជាស្អាត ។ យើងដឹងហើយថា ការចោលសំរាមក្នុងសមុទ្រ ជាបញ្ហាមិនមែនតែនៅក្នុង ប្រទេសកម្ពុជាទេ ប៉ុន្តែនៅទូទាំងពិភពលោក ។ ប៉ុន្តែយើងធ្វើការឆ្ពោះទៅរកការកាត់បន្ថយ ឬបើអាចលុបបំបាត់ការចោល សំរាមតាមសមុទ្រនៅកម្ពុជា»។
![](https://dap-news.com/wp-content/uploads/2024/07/photo_2024-07-24_09-24-54-1024x682.jpg)
លោករដ្ឋមន្ដ្រី អ៊ាង សុផល្លែត បានបន្ដថា កម្ពុជាបានចាប់ផ្តើមយុទ្ធនាការមួយ ដែលមានឈ្មោះថា «ថ្ងៃនេះ ខ្ញុំមិនប្រើថង់ ប្លាស្ទិកទេ» ទទួលបានមនុស្សចូលរួមពីមនុស្សជាង ៨ លាននាក់ ឲ្យចូលរួមក្នុងយុទ្ធនាការ ដែលលោក ហៅថា គ្រាន់តែជាយុទ្ធនាការប្តេជ្ញាចិត្ត។ យើងបានចាប់ផ្តើមយុទ្ធនាការទីពីរ ដែលមានឈ្មោះថា «កម្ពុជាស្អាត ខ្មែរធ្វើបាន» រហូតដល់ពេលនេះ ទទួលបានឃុំ សង្កាត់ ចំនួនជាង ៦០០ ក្នុងចំណោមឃុំចំនួន ១ ៦៥២ ដែលបានចូលរួមត្រឹមតែ ពីរខែប៉ុណ្ណោះ ។ ក្រឡេកទៅមើលស្ថិតិ ប្រទេសកម្ពុជាបានកាត់បន្ថយការ ប្រើប្រាស់ផ្លាស្ទិក បានចំនួន ៧៤,១% ក្នុងរយៈពេល ១១ខែ កន្លងមកនេះ បើធៀបនឹងឆ្នាំមុន ។ ប្រសិនជាបើគ្មានការកាត់បន្ថយទេ ចំនួនប្លាស្ទិកនេះ ប្រមាណពាក់កណ្ដាលអាចនឹងប៉ះពាល់ដល់បរិស្ថាន អាចធ្លាក់ចូលទៅសមុទ្រ ឬអាចចូលទៅទន្លេ ។ នេះគ្រាន់តែជាការរួមចំណែកពីកម្ពុជា ។ ស្ថិតិរបស់អង្គការសហប្រជាជាតិបានចេញផ្សាយកន្លងមក បានបង្ហាញថា នៅឆ្នាំ២០៥០ ចំនួនប្រជាជនប្លាស្ទិក នឹងមានច្រើនជាងចំនួនត្រីក្នុងមហាសមុទ្រ៕
![](https://dap-news.com/wp-content/uploads/2020/08/1-1.png)