អាជ្ញាធរខេត្តតាកែវ ចុះបោះបង្គោលតម្រុយថ្មី ១៤២បង្គោល សម្រាប់គម្រោងព្រែកជីកហ្វូណនតេជោ ក្នុងភូមិសាស្ត្រខេត្ត ដើម្បីបង្រួមផលប៉ះពាល់
តាកែវ ៖ លោក វ៉ី សំណាង អភិបាលខេត្តតាកែវ រួមជាមួយអាជ្ញាធរដែនដី និងក្រុមការងារបច្ចេកទេសបោះតម្រុយ បង្គោលតម្រាយ ផ្លូវព្រែកជីកហ្វូណនតេជោ បានអញ្ជើញចុះពិនិត្យ និងបោះបង្គោលតម្រុយថ្មី ចំនួន ១៤២ បង្គោល ដោយផ្ទាល់នៅទីតាំងភូមិសាស្ត្រជាក់ស្តែង នៅថ្ងៃទី១៩ ខែតុលា ឆ្នាំ២០២៦។
ក្នុងឱកាសចុះពិនិត្យទីតាំងផ្ទាល់នោះ លោក អភិបាលខេត្តតាកែវ បានបញ្ជាក់ថា ការចុះបោះបង្គោលតម្រុយថ្មីបន្ថែមនៅពេលនេះ គឺជាការអនុវត្តការងារបច្ចេកទេសយ៉ាងយកចិត្តទុកដាក់បំផុត ដោយក្នុងនោះក្រុមការងារ បានសម្រេចដកបង្គោលតម្រុយចាស់ចំនួន ១៩ បង្គោលចេញ ដើម្បីធ្វើការតម្រង់ និងកែសម្រួលខ្សែផ្លូវទឹកឡើងវិញ ក្នុងគោលបំណងកាត់បន្ថយ និងបង្រួមផលប៉ះពាល់មកលើដីធ្លី ទ្រព្យសម្បត្តិ និងផ្ទះសម្បែងរបស់ប្រជាពលរដ្ឋ ក្នុងមូលដ្ឋានឱ្យមកនៅកម្រិតទាបបំផុតតាមដែលអាចធ្វើទៅបាន។
លោក អភិបាលខេត្ត ក៏បានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះក្រុមការងារបច្ចេកទេសទាំងអស់ ដែលបានខិតខំប្រឹងប្រែងបំពេញភារកិច្ចយ៉ាងសកម្ម យោងទៅតាមបទដ្ឋានបច្ចេកទេស និងប្រកបដោយស្មារតី ទទួលខុសត្រូវខ្ពស់។
ជាមួយគ្នានេះដែរ លោក អភិបាលខេត្ត បានថ្លែងអំណរគុណចំពោះប្រជាពលរដ្ឋក្នុងខេត្តតាកែវទាំងអស់ ដែលតែងតែបង្ហាញនូវស្មារតីសហការ រួមជើងព្រមគ្នា និងគាំទ្រយ៉ាងពេញទំហឹងដល់គម្រោងហេដ្ឋារចនាសម្ព័ន្ធប្រវត្តិសាស្ត្រ “ព្រែកជីកហ្វូណនតេជោ” មួយនេះ ដែលជាកេរមរតកដ៏មានតម្លៃ និងផ្តល់ប្រយោជន៍សេដ្ឋកិច្ចយ៉ាងធំធេងសម្រាប់ជាតិ និងប្រជាជនកម្ពុជាគ្រប់ជំនាន់ ទៅថ្ងៃមុខ៕
