ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានអំពាវនាវដល់ប្រជាពលរដ្ឋ បើកបរគោរពច្បាប់ចរាចរណ៍ឲ្យគ្រប់ៗគ្នា ព្រោះឆមាសទី១ គ្រោះថ្នាក់ចរាចរណ៍កើតឡើង ១២៦១លើក បណ្ដាលឲ្យមនុស្សស្លាប់ ២០៩នាក់ និងរងរបួស ១៧៩២នាក់។
តាមរយៈគេហទំព័រហ្វេសប៊ុក នាថ្ងៃទី៩ ខែកក្កដា ឆ្នាំ២០២១ សម្ដេច ស ខេង បញ្ជាក់ថា ក្នុងរយៈពេល១ឆមាសនេះ មានគ្រោះថ្នាក់ចរាចរណ៍កើតឡើង ១២៦១លើក (ជាង៥០ភាគរយកើតឡើងពេលយប់) បណ្ដាលឲ្យស្លាប់មនុស្ស២០៩នាក់ និងរបួស១៧៩២នាក់ ក្នុងនោះ របួសធ្ងន់១០៤៦នាក់។ តួលេខនេះ បើប្រៀបធៀបទៅនឹងគ្រោះថ្នាក់ ចរាចរណ៍កាលពីឆ្នាំមុន បានថយចុះ៣៥៨លើក ស្មើនឹង២២ភាគរយ ក្នុងនោះ ស្លាប់១៥២នាក់ ស្មើនឹង១៨ភាគរយ និងរបួសថយ៦៥៧នាក់ ស្មើនឹង២៧ភាគរយ»។
សម្ដេចរៀបរាប់ថា មូលហេតុនៃគ្រោះថ្នាក់ពាក់ព័ន្ធនឹងល្បឿន ៣៤ភាគរយ , មិនគោរពសិទ្ធិ២៣ភាគរយ , បត់៩ភាគរយ , មិនប្រកាន់ស្តាំ១៦ភាគរយ , វ៉ាជែង៨ភាគរយ , ស្រវឹង៣ភាគរយ , យានយន្ត ៣ភាគរយ និងងងុយ ១ភាគរយ។
សម្ដេច ស ខេង មានប្រសាសន៍ថា «ខ្ញុំសូមអំពាវនាវជនរួមជាតិទាំងអស់ សូមប្រកាន់យកការបើកបរដោយគោរពច្បាប់ ចរាចរណ៍ឲ្យគ្រប់ៗគ្នា និងគ្រប់មធ្យោបាយធ្វើដំណើរ ព្រមទាំងមានស្មារតីប្រុងប្រយ័ត្នឲ្យបានខ្ពស់ និងគ្រប់ពេលវេលា។ បើស្រលាញ់អាយុជីវិតអ្នក និងក្រុមគ្រួសារអ្នក ព្រមទាំងគោរពជីវិត និងសេចក្ដីសុខអ្នកដទៃសូមរួមគ្នា គោរពច្បាប់ឲ្យបានល្អ។ នៅពេលយើងគ្រប់គ្នាគោរពច្បាប់បានល្អនោះនឹងធ្វើឲ្យស្ថានភាពចរាចរណ៍ នៅក្នុងប្រទេសយើង មានភាពល្អប្រសើរ កាត់បន្ថយបានអ្នកស្លាប់របួស ពិការ ការខាតបង់ថវិកា និងទ្រព្យសម្បត្តិ ព្រមទាំងរួមចំណែកលើកតម្កើង កិត្តិយសជាតិ ផងដែរ»។
ជាងនេះទៅទៀត រដ្ឋមន្ដ្រីក្រសួងមហាផ្ទៃ ក៏បានលើកឡើងទៀត រយៈពេល៦ខែ ឆ្នាំ២០២១ សមត្ថកិច្ចបានត្រួតពិនិត្យយានយន្ត ចំនួន១០២,៩៩៥គ្រឿង រួមមាន ៖ ម៉ូតូល្មើស ចំនួន៧៧,៧៩៤គ្រឿង ក្នុងចំណោមនោះ ការល្មើសដោយសារមិនពាក់មួកសុវត្ថិភាព មាន៩០ភាគរយ សញ្ញាចរាចរណ៍៦ភាគរយ ផ្លាកលេខ២ភាគរយ ទូរស័ព្ទ២ភាគ និងបើកបរទាំងស្រវឹង១ភាគរយ។
រដ្ឋមន្ដ្រីមហាផ្ទៃ បានបន្ថែមថា រកឃើញរថយន្តល្មើស ចំនួន ២៨,២០១គ្រឿង (រថយន្តធំជាង៦០០គ្រឿង) ហើយក្នុងចំណោមនោះ រថយន្តល្មើសខ្សែក្រវ៉ាត ៥២ភាគរយ ល្បឿន១៦ភាគរយ ទូរស័ព្ទ១០ភាគរយ សញ្ញាចរាចរណ៍៧ភាគរយ ផ្លាកលេខ៥ភាគរយ ល្មើសចំណុះ ៤ភាគរយ បណ្ណបើកបរ៤ភាគរយ ស្រវឹង១ភាគរយ ឆៀក ១ភាគរយ និងអាជីវកម្ម ១ភាគរយ៕
