បរទេស ៖ ប្រទេសប៉ូឡូញ នាពេលបច្ចុប្បន្ននេះ កំពុងតែបិទច្រកព្រំដែនជាប់នឹងប្រទេស បេឡារុស ដោយនិយាយថា ជនអន្តោប្រវេសន៍ បានព្យាយាមធ្វើដំណើរ សម្រុកចូលមកក្នុងប្រទេសខ្លួន នេះបើតាមសេចក្តីរាយការណ៍មួយ ដែលចេញផ្សាយ ដោយទីភ្នាក់ងារសារព័ត៌មាន Yahoo News នៅថ្ងៃទី០៩ ខែវិច្ឆិកា ឆ្នាំ២០២១ ។
វីដេអូឃ្លិបមួយកាលពីថ្ងៃចន្ទ បានបង្ហាញ ឲ្យឃើញនូវជនអន្តោប្រវេសន៍ រាប់រយនាក់ ដែលធ្វើដំណើរ ទៅដល់ច្រកព្រំដែន រវាងប្រទេសប៉ូឡូញ និងប្រទេសបេឡារុស ហើយក្រុមជំនួយមនុស្សធម៌ បាននិយាយថា ពួកគេទាំងនោះ ប្រឈមមុខនឹងអាកាសធាតុដ៏ត្រជាក់ និងការខ្វះខាតចំណី អាហារនិងឱសថ ។
កាលពីថ្ងៃចន្ទ ប្រទេសប៉ូឡូញ បាននិយាយប្រាប់ថា ខ្លួនបានធ្វើការទប់ទល់រារាំង ចំពោះការប៉ុនប៉ងដំបូង របស់ក្រុមអន្តោប្រវេសន៍ ដែលប្រឹងសម្រុកឆ្លងព្រំដែន ហើយអាជ្ញាធរនិយាយ ថា ពួកគេនឹងបិទច្រកព្រំដែន Kuznica នាព្រឹកថ្ងៃអង្គារ ដែលវាជាច្រកព្រំដែនមួយ ក្នុងចំណោមច្រកព្រំដែន៣ ជាប់នឹងប្រទេសបេឡារុស ។
គួរបញ្ជាក់ថា ក្រុមមនុស្សធម៌ បានធ្វើការចោទប្រកាន់ប្រទេសប៉ូឡូញ ពីបទបំពានសិទ្ធិសុំជ្រក កោណអន្តរជាតិ តាមរយៈការបណ្ដេញពួកអន្តោប្រវេសន៍ ឲ្យធ្វើដំណើរត្រឡប់ចូល ទៅក្នុងប្រទេសបេឡារុសវិញ ប៉ុន្តែប្រទេសប៉ូឡូញ បាននិយាយតបវិញថា ចំណាត់ការរបស់ខ្លួន គឺជាទង្វើស្របច្បាប់៕
ប្រែសម្រួល៖ប៉ាង កុង
