សិង្ហបុរី៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី១៣ ខែកុម្ភៈ ឆ្នាំ២០២២ថា ប៉ូលិសបាននិយាយថា មនុស្ស៩នាក់បានស្លាប់ និង៣នាក់រងរបួសនៅភាគខាងត្បូងនៃប្រទេសហ្វីលីពីន កាលពីថ្ងៃសៅរ៍ នៅគ្រាដែលក្បួនរថយន្ត SUV ត្រូវបានបាញ់ប្រហារនៅក្នុងការវាយឆ្មក់មួយ ដែលពាក់ព័ន្ធនឹងជម្លោះរវាងត្រកូលមូស្លីម ជាមួយគូប្រជែង ។
ការវាយប្រហារនេះបានកើតឡើងនៅក្នុងតំបន់ដែលមានប្រវត្តិនៃអំពើហឹង្សាជាយូរយារណាស់មកហើយ និងរយៈពេលខ្លីមួយពីកន្លែងដែលមនុស្ស៥៨នាក់ រួមទាំងអ្នកកាសែត៣២នាក់ត្រូវបានសម្លាប់នៅក្នុងការសម្លាប់រង្គាលក្នុងរឿងនយោបាយដ៏អាក្រក់បំផុតរបស់ប្រទេសក្នុងឆ្នាំ២០០៩ ។យោងតាមប៉ូលិសបានឱ្យដឹងថា មេដឹកនាំត្រកូល Peges Mamasainged និងមនុស្ស៨នាក់ផ្សេងទៀតត្រូវបានសម្លាប់ ខណៈដែលពួកគេធ្វើដំណើរតាមផ្លូវចំការក្នុងខេត្ត Maguindanao ។
គួរបញ្ជាក់ថា ទាំងជនរងគ្រោះ និងអ្នកវាយប្រហារត្រូវបានដឹកនាំដោយអតីតមេបញ្ជាការក្រុមទ័ពព្រៃមូស្លីម ដែលបានធ្វើការបះបោរបង្ហូរឈាមអស់រយៈពេលជាច្រើនទសវត្សរ៍នៅក្នុងតំបន់ មុនពេលកិច្ចព្រមព្រៀងសន្តិភាពត្រូវបានចុះហត្ថលេខាក្នុងឆ្នាំ២០១៤ អ្នកនាំពាក្យប៉ូលិសខេត្ត Fhaeyd Cana បានប្រាប់ដល់ទីភ្នាក់ងារ AFP ដូច្នេះ ។
លោក Cana បានលើកឡើងថា អាជ្ញាធរកំពុងស្វែងរកជនសង្ស័យដែលដឹកនាំដោយគូប្រជែងរបស់ Mamasainged ដោយបន្ថែមថា គ្រួសារទាំង២មានជាប់ពាក់ព័ន្ធក្នុងជម្លោះបង្ហូរឈាមដ៏រ៉ាំរ៉ៃជាយូរមកហើយ ។
គ្រួសារមូស្លីមដែលប្រដាប់ដោយអាវុធល្អនៅភាគខាងត្បូងនៃប្រទេសកាតូលិកភាគច្រើនគ្មានច្បាប់ ជួនកាលងាកទៅរកសង្គ្រាមសងសឹកតវង្សត្រកូលដើម្បីដោះស្រាយជម្លោះដែលអាចអូសបន្លាយជាច្រើនជំនាន់មកហើយ ។
លោក Cana បានលើកឡើងថា ដោយប្រើពាក្យក្នុងស្រុកថា “ជាជម្លោះបង្ហូរឈាមគ្នា” ៕
