ភ្នំពេញ៖ ក្រោយបញ្ចប់កិច្ចបប្រជុំចង្អៀតរដ្ឋមន្រ្តីការបរទេសអាស៊ាន លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេសខ្មែរ និងជាប្រេសិតពិសេសរបស់អាស៊ាន បានធ្វើការប្ដេជ្ញាបំពេញតួនាទី របស់ខ្លួនឲ្យអស់ពីសមត្ថភាពដើម្បីកម្ពុជា និងអាស៊ានទាំងមូល។
នៅលើបណ្ដាញសង្គមហ្វេសប៊ុក នៅថ្ងៃទី១៨ ខែកុម្ភៈ ឆ្នាំ២០២២នេះ លោក ប្រាក់ សុខុន បានលើកឡើងថា «កិច្ចប្រជុំចង្អៀត រដ្ឋមន្រ្តីការបរទេសអាស៊ាន បានប្រព្រឹត្តទៅយ៉ាងរលូន»។
លោក ប្រាក់ សុខុន បានវាយតម្លៃខ្ពស់ ចំពោះការចូលរួមចំណែ កយ៉ាងសកម្មរបស់សហសេវិកទាំងអស់ ក្នុងការពិភាក្សាអំពីបញ្ហាប្រឈមធំៗ ក្នុងតំបន់យើងនាពេលបច្ចុប្បន្ន និងអនាគត។
លោកគូសបញ្ជាក់ថា «ទាំងនេះ គឺសំដៅធានាថាអាស៊ាននឹងបន្តអភិវឌ្ឍន៍ និងរីកចម្រើនជាមួយគ្នា ដោយមិនទុកមួយណាចោលនោះឡើយ»។
លើសពីនេះ លោក ប្រាក់ សុខុន ក៏បានឲ្យដឹងផងដែរថា ឯនៅខាងក្រោយឆាកវិញ គឺមានក្រុមការងារ មួយដែលមានឆន្ទៈ និងសមត្ថភាពខ្ពស់។
លោកក៏ថ្លែងអំណរអរគុណយ៉ាងជ្រាលជ្រៅចំពោះ ការខិតខំប្រឹងប្រែង និងការចូលរួមចំណែក របស់អ្នកទាំងអស់គ្នា ដើម្បីធ្វើឲ្យព្រឹត្តិការណ៍នេះទទួលបានជោគជ័យ។
លោកថា នេះក៏ជាបទពិសោធន៍ ដ៏មានតម្លៃមួយសម្រាប់កម្ពុជាផងដែរ។
លោកបញ្ជាក់ថា «កម្ពុជាទន្ទឹងរង់ចាំរៀបចំកិច្ចប្រជុំផ្សេងៗទៀតក្នុងឆ្នាំនេះ។ ខ្ញុំក៏នឹងបន្តបំពេញតួនាទីរបស់ខ្ញុំឱ្យអស់ពីសមត្ថភាពដើម្បីកម្ពុជា និងអាស៊ានទាំងមូល»។
សូមរំលឹកថា ក្នុងនាមជាប្រេសិតពិសេសរបស់អាស៊ាន ដែលទើបតែតែងតាំង នាពេលថ្មីៗនេះ លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេសខ្មែរ ក៏នឹងអញ្ជើញទៅប្រទេសមីយ៉ាន់ម៉ា នៅដើមខែមីនា ក្រោយពីបញ្ចប់ដំណើរទៅកាន់ប្រទេសនៅផ្នែកអឺរ៉ុប នាចុងខែនេះ ៕
