បរទេស៖ អ្នកនាំពាក្យក្រសួងការបរទេសចិន លោក Wang Wenbin បានថ្កោលទោសការលើកឡើង “ក្លែងក្លាយ” និង “គួរឱ្យស្អប់ខ្ពើម” ដែលថា រដ្ឋាភិបាលទីក្រុងប៉េកាំងបានស្នើឱ្យរុស្ស៊ីពន្យារពេលការលុកលុយទៅលើអ៊ុយក្រែនរហូតដល់ក្រោយព្រឹត្តិការណ៍កីឡាអូឡាំពិករដូវរងាឆ្នាំ 2022 បានបញ្ចប់។
យោងតាមសារព័ត៌មាន RT ចេញផ្សាយកាលពីថ្ងៃទី៣ ខែមីនា ឆ្នាំ២០២២ បានឱ្យដឹងថា ថ្លែងនៅក្នុងសន្និសីទសារព័ត៌មានប្រចាំថ្ងៃកាលពីថ្ងៃព្រហស្បតិ៍ លោក Wang បានប្រាប់អ្នកយកព័ត៌មានថា ការចោទប្រកាន់នៅក្នុងកាសែត New York Times “គឺជាព័ត៌មានក្លែងក្លាយសុទ្ធសាធ ហើយអាកប្បកិរិយានៃការបង្វែរការយកចិត្តទុកដាក់ និងការផ្លាស់ប្តូរការស្តីបន្ទោស គឺគួរឱ្យស្អប់ខ្ពើមណាស់” ។ លោកបានបញ្ជាក់ជាថ្មីពីការអះអាងរបស់ប្រទេសចិនដែលថា អាមេរិកបានបង្ករឿងជាមួយរុស្ស៊ី ដោយមិនឱ្យបដិសេធសមាជិកភាពណាតូសម្រាប់អ៊ុយក្រែន។
សូមជម្រាបថា របាយការណ៍នៅក្នុងកាសែត New York Times បានដកស្រង់របាយការណ៍ចារកម្មលោកខាងលិចដែលនិយាយថា មន្ត្រីជាន់ខ្ពស់ចិនបានប្រាប់មន្ត្រីជាន់ខ្ពស់រុស្ស៊ីកុំឱ្យឈ្លានពានអ៊ុយក្រែនរហូតដល់ព្រឹត្តិការណ៍កីឡាអន្តរជាតិនៅទីក្រុងប៉េកាំងបានបញ្ចប់។
អត្ថបទនេះបានអះអាងថា “របាយការណ៍បង្ហាញថាមន្ត្រីជាន់ខ្ពស់ចិន បានដឹងដោយផ្ទាល់អំពីផែនការ ឬចេតនារបស់រុស្ស៊ី មុនពេលការឈ្លានពានបានចាប់ផ្តើម” ៕
ប្រែសម្រួលៈ ណៃ តុលា
