បរទេស៖ អនុរដ្ឋមន្ត្រីការបរទេសអាមេរិក លោកស្រី Wendy Sherman បានបង្ហើបថា វាអាចនឹងកាន់តែពិបាកក្នុងប៉ុន្មានថ្ងៃខាងមុខ ក្នុងការបញ្ជូនអាវុធទៅកាន់ប្រទេសអ៊ុយក្រែន សម្រាប់ជំនួយក្នុងជម្លោះរបស់ប្រទេសនេះជាមួយរុស្ស៊ី។
យោងតាមសារព័ត៌មាន RT ចេញផ្សាយនៅថ្ងៃទី៨ ខែមីនា ឆ្នាំ២០២២ បានឱ្យដឹងថា ថ្លែងទៅកាន់អ្នកសារព័ត៌មាននៅទីក្រុងម៉ាឌ្រីដ ប្រទេសអេស្បាញកាលពីថ្ងៃចន្ទ លោកស្រី Sherman បានសរសើរ “សហគមន៍អន្តរជាតិ” សម្រាប់ “ការឆ្លើយតបយ៉ាងខ្លាំង” និងមានធនធានក្នុងការស្វែងរកមធ្យោបាយដើម្បីផ្តល់អាវុធ គ្រាប់រំសេវ និងហិរញ្ញវត្ថុដល់អ៊ុយក្រែន។ ទោះជាយ៉ាងណាក៏ដោយ ការនាំចេញបែបនេះ “អាចកាន់តែពិបាកនៅថ្ងៃខាងមុខ ហើយយើងនឹងត្រូវស្វែងរកវិធីផ្សេងទៀតដើម្បីគ្រប់គ្រងរឿងនេះ” ។
អនុរដ្ឋមន្ត្រីការបរទេសអាមេរិករូបនេះ បានពន្យល់ថា “វាសំខាន់ណាស់ដែលអ្វីដែលយើងបញ្ជូន គឺជាអ្វីដែល ប្រធានាធិបតីអ៊ុយក្រែន Volodymyr Zelensky ស្នើសុំ ពីព្រោះគាត់ដឹងពីអ្វីដែលយោធារបស់គាត់ត្រូវការបំផុត” ។
លោកស្រី Sherman បានបដិសេធមិនរៀបរាប់លម្អិតអំពីបញ្ហាអ្វីដែលអាចគំរាមកំហែងដល់ភាពងាយស្រួលនៃការដឹកជញ្ជូនបន្តឡើយ ក្នុងពេលដែលរដ្ឋបាលលោក Biden បច្ចុប្បន្នកំពុងគិតពីរបៀបដើម្បីសម្រួលដល់ការទាមទាររបស់លោក Zelensky សម្រាប់យន្តហោះចម្បាំងដែលយោធារបស់គាត់អាចហោះហើរបាន ដោយសារតែអាកាសយានិកអ៊ុយក្រែន អាចបើកយន្តហោះប៉ូឡូញដែលសល់ពីសម័យសូវៀតប៉ុណ្ណោះ៕ប្រែសម្រួលៈ ណៃ តុលា
