មន្រ្តីថា កងទ័ពអាល្លឺម៉ង់ គ្មានអាវុធដូចដែល អធិការបតី បានសន្យាផ្តល់ឱ្យអ៊ុយក្រែន ឡើយ

បរទេស៖ ក្រសួងការពារជាតិអាល្លឺម៉ង់ បាននិយាយកាលពីថ្ងៃពុធថា ខ្លួនមិនអាចផ្តល់ព័ត៌មានលម្អិត ស្តីពីការសន្យារបស់អធិការបតី គឺលោក Olaf Scholz ក្នុងការផ្គត់ផ្គង់អ៊ុយក្រែន ជាមួយនឹងប្រព័ន្ធការពារ ដែនអាកាស ជាក់លាក់មួយបាននោះទេ ដោយហេតុផល ដែលបានលើកឡើងគឺថា Bundeswehr ដែលជាកងកម្លាំងប្រដាប់អាវុធ របស់ប្រទេសអាល្លឺម៉ង់ មិនមានអាវុធនៅក្នុងស្តុក។

យោងតាមសារព័ត៌មាន RT ចេញផ្សាយនៅថ្ងៃទី១ ខែមិថុនា ឆ្នាំ២០២២ បានឱ្យដឹងថា អាវុធដែលចោទសួរនោះ ត្រូវបានគេហៅថា IRIS-T ហើយវាអាចចេញជាទម្រង់មីស៊ីល រយៈចម្ងាយខ្លី ពីអាកាសទៅអាកាស ឬប្រព័ន្ធការពារដែនអាកាស រយៈចម្ងាយខ្លី ឬរយៈចម្ងាយមធ្យម។

នៅពេលសួរថា តើប្រព័ន្ធទាំងនេះមួយណា ដែលរដ្ឋាភិបាលទីក្រុងប៊ែកឡាំង គ្រោងនឹងបញ្ជូនទៅឱ្យអ៊ុយក្រែននោះ អ្នកនាំពាក្យក្រសួងការពារជាតិ លោក David Helmbold បានឆ្លើយតបថា “សំណួរនេះគួរតែត្រូវបាន ដោះស្រាយជាចុងក្រោយ ដល់ឧស្សាហកម្ម [ការពារជាតិ] ចាប់តាំងពីយើងមិនមានប្រព័ន្ធទាំងនេះ នៅក្នុងសេវាកម្មរបស់យើង” ។

លោកបានបន្ថែមថា លោកមិនអាចបញ្ជាក់ ពីបញ្ហានេះបានទេ ដោយសារ Bundeswehr មិនមានប្រព័ន្ធការពារអាកាស បែបនេះ នៅក្នុងឃ្លាំងអាវុធរបស់ខ្លួន។

សូមជម្រាបថា ការអត្ថាធិប្បាយនេះ បានធ្វើឡើងតែប៉ុន្មានម៉ោង បន្ទាប់ពីលោក Scholz អធិការបតីអាល្លឺម៉ង់បានប្រាប់សភាថា រដ្ឋាភិបាលរបស់លោក មានគម្រោងបញ្ជូនប្រព័ន្ធទំនើប បន្ថែមទៀតទៅកាន់ប្រទេសអ៊ុយក្រែន រួមទាំងប្រព័ន្ធ IRIS-T និងរ៉ាដា ដែលមានសមត្ថភាពអាចរកឃើញ ការបាញ់កាំភ្លើងធំ និងកំណត់ទីតាំងនៃប្រព័ន្ធកាំភ្លើងធំ របស់សត្រូវដែលបានបើកវា។

អធិការបតីមិនបានបញ្ជាក់ថា តើលោកចង់សំដៅ លើមីស៊ីល ពីអាកាសទៅអាកាស ឬប្រព័ន្ធមូលដ្ឋាន នៅពេលនិយាយអំពី IRIS-T នោះទេ៕

ប្រែសម្រួលៈ ណៃ តុលា