វ៉ាស៊ីនតោន ៖ សហរដ្ឋអាមេរិក កាលពីថ្ងៃព្រហស្បតិ៍ បានដាក់ទណ្ឌកម្មលើក្រុមហ៊ុន ដែលមានមូលដ្ឋាន នៅក្នុងប្រទេសចិន និងកន្លែងផ្សេងទៀត ជុំវិញការជាប់ពាក់ព័ន្ធ របស់ពួកគេក្នុងការលក់ប្រេង និងផលិតផលគីមីឥន្ធនៈរបស់អ៊ីរ៉ង់ ។
ការផ្លាស់ប្តូរនេះ បានកើតឡើងនៅពេល ដែលក្រុងតេអេរ៉ង់បន្តពន្លឿន សកម្មភាពនុយក្លេអ៊ែរ របស់ខ្លួនដោយរំលោភ លើកិច្ចព្រមព្រៀង ពហុភាគីឆ្នាំ២០១៥ ដែលអ៊ីរ៉ង់ បានយល់ព្រមជាមួយ សហរដ្ឋអាមេរិក និងមហាអំណាចចំនួន ៥ផ្សេងទៀត ដើម្បីកំណត់កម្មវិធី នុយក្លេអ៊ែររបស់ខ្លួនជាថ្នូរ នឹងការបន្ធូរបន្ថយទណ្ឌកម្ម ។
ក្រសួងការបរទេសបាន កំណត់គោលដៅអង្គភាពចំនួនពីរ ដែលមានមូលដ្ឋាននៅក្នុងប្រទេសចិន រួមមានក្រុមហ៊ុន Zhonggu Storage and Transportation Co. ដែលប្រតិបត្តិការកន្លែងស្តុកប្រេងឆៅ ពាណិជ្ជកម្ម សម្រាប់ប្រេងអ៊ីរ៉ង់។
នាយកដ្ឋានរតនាគារ ក៏បានដាក់ទណ្ឌកម្មលើអង្គភាព ចំនួនប្រាំបីដែលមានមូលដ្ឋាន នៅទីក្រុងហុងកុង ឥណ្ឌា អ៊ីរ៉ង់ និងអារ៉ាប់រួមសម្រាប់ ការចោទប្រកាន់ថា ពួកគេជាប់ពាក់ព័ន្ធក្នុង ពាណិជ្ជកម្មគីមីឥន្ធនៈរបស់អ៊ីរ៉ង់។
ទណ្ឌកម្មរារាំងទ្រព្យសម្បត្តិ ដែលកាន់កាប់ដោយអង្គភាព ដែលបានកំណត់ នៅក្នុងសហរដ្ឋអាមេរិក និងហាមឃាត់ពួកគេ មិនឱ្យចូលរួមក្នុងប្រតិបត្តិការ ជាមួយពលរដ្ឋអាមេរិក ។
លោក Brian Nelson អនុរដ្ឋលេខាធិការរតនាគារ សម្រាប់អំពើភេរវកម្ម និងចារកម្មហិរញ្ញវត្ថុបានឲ្យដឹង នៅក្នុងសេចក្តីថ្លែងការណ៍មួយថា “សហរដ្ឋអាមេរិកប្តេជ្ញា ដាក់កម្រិតយ៉ាងធ្ងន់ធ្ងរ លើការលក់ប្រេង និង គីមីឥន្ធនៈខុសច្បាប់របស់អ៊ីរ៉ង់” ៕
