ម៉ូស្គូ៖ ក្រសួងការពារជាតិបេឡារុស្ស បានឲ្យដឹងថា ទាហានរុស្ស៊ីជិត ៩០០០នាក់ នឹងត្រូវឈរជើងនៅក្នុងប្រទេសនេះ ជាផ្នែកមួយនៃក្រុមកងកម្លាំងក្នុងតំបន់ ដើម្បីការពារព្រំដែនរបស់ខ្លួន។
លោក Valeriy Revenko ប្រធាននាយកដ្ឋានសហប្រតិបត្តិការ យោធាអន្តរជាតិរបស់ ក្រសួងបានសរសេរនៅលើ Twitter ថា “រថភ្លើងកងទ័ពដំបូងជាមួយទាហានរុស្ស៊ី ដែលជាផ្នែកមួយនៃ កងកម្លាំង បានចាប់ផ្តើមមកដល់ប្រទេសបេឡារុស្ស” ។
នៅក្នុងនោះដែរ ប្រធានាធិបតីរុស្ស៊ី លោក វ្ល៉ាឌីមៀ ពូទីន ក៏សន្យាថានឹងផ្គត់ផ្គង់ បេឡារុស្ស នូវកាំជ្រួចដែលមាន សមត្ថភាពនុយក្លេអ៊ែរ។ លោកបានបន្តថា ព័ត៌មានបន្ថែមនឹងត្រូវបានផ្តល់ជូន នៅក្នុងសន្និសីទសង្ខេបមួយសម្រាប់អនុព័ន្ធយោធា។
ប្រធានាធិបតីបេឡារុស្ស លោក Alexander Lukashenko បានឲ្យដឹងកាលពីសប្តាហ៍មុនថា កងទ័ពរបស់លោក នឹងត្រូវបានបង្ហោះជាមួយទាហានរុស្ស៊ី នៅជិតព្រំដែនអ៊ុយក្រែន បន្ទាប់ពីអ្វីដែលលោកបានលើកឡើងថា ជាការគំរាមកំហែងពីអ៊ុយក្រែន និងលោកខាងលិច។
ការប្រកាសនេះធ្វើឡើងបន្ទាប់ពី វីដេអូដែលក្រសួងបានចែករំលែក កាលពីយប់ថ្ងៃសៅរ៍នៃអ្វីដែលខ្លួន បានឲ្យដឹងថាជាទាហានរុស្ស៊ីបានមកដល់ប្រទេសបេឡារុស។ ហើយក៏មានរូបភាពពីក្រសួង បានបង្ហាញទាហានទទួលស្វាគមន៍ ដោយស្ត្រីស្លៀកសំលៀកបំពាក់ប្រពៃណី និងចែកនំប៉័ង និងអំបិល ៕
ប្រែសម្រួល ឈូក បូរ៉ា
